Governu Timor-Leste

Sekretaria Estadu ba Formasaun Profisionál no Empregu (SEFOPE) liu hosi Diresaun Nasionál Empregu entrega sertifikadu ba supervizór 62 ne’ebé involve iha rehabilitasaun estrada (programa Cash for Works), supervizór 6 ba programa Servisu Hamutuk (Team Work) no supervizór 2 hodi levanta dadus.

Sekretáriu Estadu ba Formasaun Profisionál no Empregu, Bendito Freitas, iha nia intervensaun hateten katak, kbiit hosi supervizór distritu, nu’udar forma ida ba desentralizasaun, fó duni rezultadu di’ak iha programa rehabilitasaun estrada rurál iha tinan 2008, 2009 no 2010 iha distritu Timor laran tomak, ne’e hatudu katak Governu labele servisu mesak iha prosesu dezenvolvimentu nasionál, maibé hetan kooperasaun hosi komunidade, Igreja, parseiru nasionál no internasionál importante tebetebes.

Bendito Freitas mós agradese ba Organizasaun Internasionál ba Traballu (OIT) iha Timor-Leste ne’ebé durante ne’e servisu hamutuk ho SEFOPE, no mós fó apoiu formasaun enjeñaria ba supervizór distritu atu nune’e bele hasai sira nia kapasiadade.

Objetivu hosi programa rehabilitasaun estrada rurál la’ós haree dei’t ba kualidade servisu maibé oinsá SEFOPE bele fó servisu ba ema barak hanesan feto no mane, juventude no katuas, ferik, no hosi sira nia partisipasaun bele hetan rendimentu ba sira nia familia no bele tulun sira nia moris loron-loron nian.

Sekretáriu hatutan tan katak projetu rehabiltasaun estrada ba tinan 2011 ne’e sei kontinua ba área rurál ne’ebé seidauk hetan apoiu.