Governu Timor-Leste

Primeiru-Ministru Kay Rala Xanana Gusmão, prezide sesaun abertura Semináriu Forum Tasi Nasaun sira CPLP nian ba dala 5, iha loron 25 fulan-novembru tinan 2025, iha Salaun Nobre Ministériu Negósius Estranjeirus no Kooperasaun, iha Dili. Semináriu ne’ebé dedika ba tema “Dezafiu Jurídiku sira iha Jestaun no Uzu Tasi nian”, subliña tasi nu’udar fatór indispensável ba kreximentu ekonómiku sustentável no dezenvolvimentu sosiál iha nasaun luzófonu sira. 

Iha ninia intervensaun, Primeiru-Ministru destaka katak, “maske kompleksidade husi dezafiu sira-ne’e – jurídiku, teknolójiku no ambientál – ita hatene katak tasi nu’udar fatór indispensavel ida ba kreximentu ekonómiku sustentável no ba dezenvolvimentu sosiál ita-nia nasaun, agora no aban-bainrua nian. Tanba ne’e, inasaun (la halo buat ruma) la’ós opsaun ida!”. Nia subliña liután katak kooperasaun entre nasaun sira CPLP nian “importante liután iha époka ida ne’ebé ita moris daudaun ne’e, nakonu ho inserteza, tensaun no fragmentasaun iha nivel globál

Xanana Gusmão rekorda katak Timor-Leste hanesan nasaun úniku hosi CPLP ne'ebé lokaliza iha Sudeste Aziátiku no, foin lalais ne'e sai hanesan membru ba dala 11 hosi ASEAN, faktu ida ne'ebé reprezenta "oportunidade foun sira ba koperasaun ekonómiku no polítika", nune'e mós responsabilidade foun hodi hakbesik nasaun sira sudeste aziátiku nian no nasaun luzófonu sira. Xefe Governu refere mós ba progresu ne’ebé halo tiha ona hosi CPLP dezde aprovasaun Estratéjia Oseanu CPLP no Planu Asaun Díli nian iha tinan 2016, ne’ebé hametin governasaun konjunta ba espasu marítimu, protesaun ba ambiente tasi, no dezenvolvimentu sustentável komunidade luzófona sira nian.

Primeiru-Ministru identifika área prioridade tolu ba asaun konsertada hosi nasaun sira CPLP nian: “soberania marítima no rezolusaun fronteiras”,  “promove Ekonomia Azúl ba dezenvolvimentu sustentável,” no projesaun “vizaun estratéjika CPLP nian ba oseanu.” Nia hanoin hikas, iha kontestu ida-ne'e,Timor-Leste nia esperiénsia iha prosesu konsiliasaun obrigatóriu tuir Konvensaun Nasoins Unidas kona-ba Direitu Tasi nian ba delimitasaun fronteira marítima ho Austrália, nu’udar ezemplu rezolusaun pasífika ba disputa sira tuir lei internasionál.

Iha área Ekonomia Azul, Xanana Gusmão destaka rikeza hosi biodiversidade tasi Timor-Leste nian, ne'ebé lokaliza iha Triángulu Korál, no refere ba "Polítika no Planu Asaun ba Promosaun Ekonomia Tasi ida ne'ebé Reziliente no Sustentável iha Timor-Leste, 2025-2035", ne'ebé foin lalais ne'e aprova iha versaun preliminar husi Governu, hanesan "roteiru ida ba kreximentu integradu no inkluzivu hosi setór tasi-ibun, tasi-ibun no marítimu nasaun nian", ho foku ba "diversifikasaun ita-nia ekonomia, hamosu rendimentu ba ita-nia povu no kria oportunidade empregu ba ita-nia joven sira", iha tempu hanesan hodi kontribui mós "ba vizaun luan liu hosi CPLP hodi promove, dezenvolve no konserva rekursus tasi nian no ninia ekosistema".

Semináriu ne’e, organiza hosi Institutu Defeza Nasionál Timor-Leste (IDN-TL), ne’ebé sei asume Sekretariadu Ezekutivu Fórum Marítimu CPLP nian ba períodu 2024–2025, halibur matenek-na’in sira iha direitu tasi nian, reprezentante governu nian, akadémiku sira, no profisionál sira hosi setór marítimu nasaun luzófonu nian. Programa ne’e inklui painél temátiku tolu kona-ba fundamentu jurídiku direitu   tasi nian no instrumentu internasionál relevantes, kestaun fronteira marítima no disputa territoriál sira, no mós ambiente, sustentabilidade, no seguransa marítima, inklui dezafiu sira relasiona ho protesaun kosistema, atividade ekonómika iha tasi, no impaktu hosi mudansa klimátika.

Iha tempu hanesan ho Semináriu Fórum Tasi CPLP ba dala 5, realiza mós serimónia asinatura ba Memorandu  Entendimentu entre g7+ no Institutu Defeza Nasionál Timor-Leste, asina husi Sekretáriu-Jerál g7+, Helder da Costa, no Diretór Interinu IDN-TL, Nuno M. Corvelo de A Sarmento. Memorandu ne’e estabelese parseria ida atu hametin kolaborasaun iha programa edukativu no formasaun iha área sira ne’ebé iha relasaun ho pás, seguransa no governasaun, no mós ba partisipasaun husi Estadus-membrus g7+ nian iha atividade ensinu superiór no formasaun ne’ebé promove husi  IDN-TL

Aleinde Primeiru-Ministru, iha sesaun abertura ne’e hetan partisipasaun hosi Ministru Defeza, Donaciano Costa Gomes, Ministru Interiór, Francisco da Costa Guterres, Ministru Edukasaun, Dulce de Jesus, membru Governu sira seluk, reprezentante korpu diplomátiku ne’ebé akreditadu iha Dili, partisipante sira iha Kursu Estadu-Maiór Konjuntu Integradu no delegasaun sira husi Estadu-membru CPLP nian .

Semináriu ba dala 5 Fórum Marítimu País sira CPLP nian sei hala’o iha Dili iha loron 25 no 26 fulan-novembru tinan 2025, iha formatu (prezensiál no online), loron daruak sei inklui reuniaun plenária hosi membru sira Fórum nian no serimónia ba transferénsia Sekretariadu Ezekutivu ba membru institusionál foun ida, hodi asegura kontinuidade hosi serbisu no koperasaun marítima iha espasu luzófonu nian.