Governu Timor-Leste

Prezidente Repúblika, José Ramos-Horta, inaugura Espozisaun Dezenvolvimentu Governasaun Lokál no Feira Nasionál, iha loron 24 fulan-novembru tinan 2025, iha Tasitolu, hodi marka inísiu ba komemorasaun Proklamasaun Unilaterál Independénsia Repúblika Demokrátika Timor-Leste nian ba dala 50. Serimónia ne’e hetan partisipasaun husi Prezidente Komisaun Organizadora Nasionál no Ministru Administrasaun Estatál, Tomás do Rosário Cabral. 

Atividade sira ne’e halo parte iha programa nasionál komemorasaun loron 28 fulan-novembru tinan 1975, ne’ebé selebra iha tinan ne’e ho lema “Ho Selebrasaun tinan 50 ida-ne’e, ne’ebé ita liu ona, asegura ita-nia  konfiansa ba  tempu agora no esperansa ba iha futuru!”. Komisaun Organizadora hahú kalendáriu komemorativu iha loron 3 fulan-novembru, ho abertura ba kompetisaun futsál, no espozisaun ne’e prevee sei enserra iha loron 29 fulan-novembru, iha Tasitolu.

Programa ne’e inklui pavillaun munisípiu sira ne’ebé hatudu produtu agríkola  no demonstrasaun governasaun lokál hosi munisípiu 12, Rejiaun Administrativa Oekusi no Ambenu, no husi Autoridade Administrativa Ataúru nian. Espozisaun nasionál ne’e inklui mós konteúdu hosi Prezidénsia Konsellu Ministrus no Ministériu Administrasaun Estatál, enkuantu ministériu sira seluk promove atividade desentralizadu iha munisípiu sira, tuir despaxu Primeiru-Ministru nian.

Selebrasaun sira ne’e inklui kompetisaun futsál, dansa tradisionál, feira dezenvolvimentu munisípál, gastronomia, no artezanatu sira. Grupu 150 resin hosi produtór lokál sira partisipa iha área gastronomia no artezanatu nian. Komponente kulturál konta ho grupu dansa no banda nasionál sira, no mós sira ne’ebé maihusi diáspora timoroan sira iha Sydney.

Iha ámbitu selebrasaun relijioza no sívika sira, prevee sei iha  Misa Agradesimentu, ne’ebé sei hala’o iha  loron 27 fulan-novembru, iha Katedrál Dili, organiza hosi Autoridade Munisipál Dili. Tuir fali ho omenajen ba Eroi sira Nasaun nian, ho tau ai-funan simbóliku iha Monumentu Nain-Feto, iha Lesidere, no iha Jardín Eroi sira nian, iha Metinaru.

Iha loron 28 fulan-novembru, serimónia ofisiál hasa’e no hatún bandeira sei hala’o iha Palásiu Governu, ida-idak sei hala’o iha tuku 8:00 dadeer no tuku 5:00 lokraik.

Ministru Administrasaun Estatál, nu’udar Prezidente Komisaun Organizadora, apela ba populasaun tomak hodi partisipa iha atividade sira ne’e, no subliña importánsia atu fó sai   serbisu ne’ebé dezenvolve hosi munisípiu sira, iha faze ne’ebé sira prepara hela ba implementasaun podér lokál nian. Nia destaka mós oportunidade ba korpu diplomátiku sira no parseirus internasionál hodi halo interasaun ho autoridade lokál sira kona-ba programa sira ne'ebé hetan apoiu iha teritóriu sira ne’e.

Iha sesaun abertura ne’e, hetan partisipasaun husi reprezentante órgaun soberanu sira, membru Governu, korpu diplomátiku, ajénsia internasionál, konfisaun relijioza, autoridade sivíl no militár, veteranu, autoridade munisípiu, no bainaka sira.