Governu Timor-Leste

Iha loron 24 fulan-novembru tinan 2025, Primeiru-Ministru, Kay Rala Xanana Gusmão, prezide sesaun abertura ba Forum Enerjia, Minerasaun no Negósiu Timor-Leste nian ba dala 5, ne’ebé hala’o husi loron 24 to’o 26 fulan-novembru, iha Dili. Enkontru ne’e organiza husi Governu, liuhusi Autoridade Nasionál Petróleu (ANP) no Autoridade Nasionál Minerais (ANM), iha parseria ho The Energy Circle no IN-VR, ne’ebé halibur desizór polítiku, reguladór, investidór no reprezentante sira husi empreza nasionál no internasionál hodi debate oportunidade ba dezenvolvimentu no investimentu iha setór enerjia no rekursus minerál. 

Iha ninia diskursu, Primeiru-Ministru subliña katak Fórum ne’e hanesan plataforma anuál prinsipál ba atualizasaun no fahe perspetiva sira kona-ba dezenvolvimentu indústria enerjétika no mineira iha Timor-Leste, nune’e mós kona-ba oportunidade sira ne’ebé disponivel ba setór privadu. Xanana Gusmão fó hanoin katak durante dékada rua ikus, Timor-Leste konsolida ona Estadu ida  pasífiku no demokrátiku ho sosiedade ida ne’ebé nakloke no ekonomia ida ne’ebé iha kreximentu, hodi orienta ba dezenvolvimentu sustentavel no defende interese nasionál ba tempu naruk.

Xefe Governu destaka mós Timor-Leste nia adezaun foin lalais ne’e ba Organizasaun Mundiál Komérsiu no konklui prosesu adezaun plena iha Asosiasaun Nasaun Sudeste Aziátiku (ASEAN), hodi subliña katak alkanse sira ne’e hametin kredibilidade ekonómika nasaun nian no koloka Timor-Leste iha pozisaun estratéjiku iha rejiaun. "Adezaun ba ASEAN koloka Timor-Leste iha pozisaun estratéjika ida hodi sai hanesan sentru enerjétiku no mineiru ida importante iha Sudeste Aziátiku", nia hateten.

Xanana Gusmão hateten katak Planu Estratéjiku Dezenvolvimentu tinan 2011–2030 nian, define enerjia no minerál, hamutuk ho turizmu no agrikultura, hanesan setór prioritáriu hodi kria empregu, atrai investimentu no diversifikasaun ekonómika.  Iha kontestu ida ne’e, nia enkuadra Projetu Tasi Mane, ne’ebé integra ba Suai Supply Base, sentru industriál Natarbora ho instalasaun gás naturál likifeitu no éliu, refinaria, terminál marítimu, sentrál elétrika Betanu, no infraestruturas rodoviárias no  urbana relevantes, hanesan eixu estruturante ba industrializasaun kosta súl nian.

Primeiru-Ministru reafirma katak kampu petrolíferu Greater Sunrise maka pilár sentrál ba estratéjia dezenvolvimentu enerjétiku no industriál. “Governu nia pozisaun kona-ba Greater Sunrise sempre klaru. Gás naturál husi Greater Sunrise tenke prosesa iha rai-maran, iha Timor-Leste,” nia deklara hodi subliña katak “ne’e esensiál ba dezenvolvimentu nasionál.”  Nia rekorda katak avaliasaun independente sira konfirma ona viabilidade hosi gazodutu submarinu ida ba kosta súl no prosesamentu iha teritóriu nasionál ne’e desizivu hodi garante katak valór ne'ebé mosu, permanese iha Timor-Leste, hametin seguransa enerjétika, apoia konstrusaun ba baze industriál, no kria empregu rihun ba rihun, liuliu ba foinsa’e sira.

Xefe Governu salienta katak dezenvolvimentu Greater Sunrise no kreximentu setór mineiru maka sentru ba  konsolidasaun ekonomia ida ne’ebé forte no sustentável ne’ebé iha kapasidade atu garante moris-di’ak populasaun nian. “Povu timoroan terus barak ona ba nia ukun rasik-an. Agora ita hasoru dezafiu atu harii ekonomia ida ne’ebé iha kapasidade atu garante ita-nia populasaun nia moris di’ak,” nia hateten, hodi apela ba partisipasaun ativu hosi investidór no parseiru internasionál sira hodi harii parseria foun no dinamiza investimentu produtivu.

Xanana Gusmão bolu atensaun ba interese ne’ebé aumenta iha minerais, inklui osan-mean, kobre, magnéziu, no rekursu sira seluk, ne’ebé nia dezenvolvimentu bele apoia diversifikasaun ekonómika, hametin abilidade téknika nasionál, no kria empregu, liuliu iha área rurál sira. Iha kontestu ida ne’e, nia subliña katak Timor-Leste iha regras klara no enkuadramentu legál ida ne’ebé sólidu hodi regula dezenvolvimentu minerál no oferese previzibilidade no konfiansa ba investidór sira.

Prezidente ANP, Gualdino do Carmo da Silva, destaka katak realizasaun Fórum ne’e ho parseiru internasionál sira nu’udar rezultadu husi serbisu promosionál ne’ebé la’o hela, ne’ebé hamosu ona resposta pozitivu no interese ne’ebé aumenta husi indústria petróleu no minerál iha Timor-Leste. Nia hateten katak investidór sira rekoñese ezisténsia rekursus nian, enkuadramentu kontratuál no legál ne'ebé favoravel ba investimentu no governasaun ne'ebé marka ho transparénsia, konsisténsia no estabilidade regulatória.

Iha sesaun abertura ne’e, marka prezensa husi Primeiru-Ministru, Vise Cedeliza Faria dos Santos, Vise-Primeiru-Ministru no Ministru Koordenadór ba Asuntus Ekonómikus, Francisco Kalbuadi Lay, Ministru Petróleu no Rekursus Naturais, Francisco da Costa Monteiro, nune’e mós Prezidente ANP no ANM, no ofisialmente lansa konkursu públiku mineiru ba konsesaun lisensas propersaun no peskiza minerál metálikus no la’os metálikus ba tinan 2025.

Fórum Enerjia, Minerasaun no Negósiu Timor-Leste ba dala 5 ne’e hetan partisipasaun husi delegadu 400 resin, inklui reprezentante sira besik nasaun 70, no sei kontinua to’o loron 26 fulan-novembru. Durante loron tolu, programa ne’e integra sesaun ne’ebé dedika ba investimentu iha setór mineiru, dezenvolvimentu Greater Sunrise, projetu sira seluk kona-ba petróleu no gás no tranzisaun enerjétika, nune’e mós momentu enkontru ho desizór públiku, reguladór, investidór no lider emprezariál sira. Objetivu mak atu hakle’an diálogu, identifika oportunidade kooperasaun nian no apoia transformasaun ekonómika iha Timor-Leste, bazeia ba Planu Estratéjiku Dezenvolvimentu tinan 2011-2030 no ho Programa Governu Konstitusionál IX nian.