Governu Timor-Leste

Rede “Vozes de Nós” ne’e, halibur organizasaun naun-governamentál sira ne'ebé dedika ba protesaun foin-sa’e no labarik sira hosi Nasaun sira ho Lian Ofisiál Portugés, hasoru malu ho Vise-Primeiru-Ministru no Ministru Koordenadór Asuntus Sosiais, Mariano Assanami Sabino, hodi aprezenta rezultadu hosi enkontru ne'ebé hala'o iha Díli no konvida governante ne’e atu sai Patronu ba Rede ne’e.

Sorumutu ne'e hala'o hafoin enkontru tékniku ne'ebé hala'o iha Ministériu Solidariedade Sosiál no Inkluzaun, husi loron 18 to’o 20 fulan-novembru, no permiti atu aprezenta ba xefe  koordenasaun Asuntus Sosiais — ne'ebé tau matan mós ba Institutu Defeza Direitu Labarik nian (INDDICA akrónimu iha portugés) — hodi aprezenta serbisu ne'ebé dezenvolve hosi organizasaun partisipante sira.

Sorumutu ne’e, ho tema “Direitu Labarik sira País CPLP nian, ohin no estratéjia  intervensaun nian iha futuru”, halibur reprezentantes hosi Estadus-membrus oioin hodi ko'alia kona-ba prioridades no estratéjias komún hodi proteje no promove direitu labarik no foin-sa’e sira.

Hanesan rezultadu hosi serbisu ne’ebé elabora ona "Deklarasaun Díli", dokumentu orientadór ida ne'ebé hakarak atu servi hanesan referénsia ba asaun konsertadu hosi nasaun CPLP sira, iha área direitu labarik no foin-sa’e sira nian iha situasaun vulneravel. Deklarasaun ne’e entrega ba Vise-Primeiru-Ministru, nu’udar Patronu Rede, hanesan espresaun husi kompromisu hamutuk hodi reforsa protesaun ba labarik no foin-sa’e sira iha CPLP.

Deklarasaun Díli

Deklarasaun Díli hanesan rezultadu hosi Interkámbiu ba dala 5 hosi Rede “Vozes de Nós”, ne'ebé halibur organizasaun sira hosi CPLP ne'ebé dedika ba defende direitu labarik no foin-sa’e sira iha situasaun vulneravel. Dokumentu ne'e fó kontinuidade ba serbisu ne'ebé hahú iha tinan 2009, iha ámbitu hosi projetu "Labarik sira iha Dalan: inkluzaun no insersaun”, ne'ebé kontribui ona hodi hametin kapasidades iha edukasaun arte, promove koperasaun entre entidade estatál no naun-estatál sira, no apoia dezenvolvimentu hosi polítikas protesaun labarik nian iha nasaun sira CPLP.

Deklarasaun ne’e aprezenta objetivu estratéjiku balu hodi orienta polítika no prátika komún sira, inklui dezenvolvimentu integrál labarik nian; prevensaun violénsia no esplorasaun saida de’it; promosaun ba edukasaun inkluziva; reforsu servisu saúde labarik nian; apoiu ba família sira; prioridade transversál ba labarik sira iha polítika no orsamentu; partisipasaun efikás hosi labarik no foin-sa’e sira; konsolidasaun no artikulasaun sistema protesaun nian; melloria  rekolla no fahe dadus; no kriasaun ba mekanizmu monitorizasaun no avaliasaun.