Governu Timor-Leste

Sekretáriu Estadu Defeza, Júlio Tomas Pinto fó posse ba Majór Renilde Côrte-Real nu’udár komandante foun ba Polisia Militár F-FDTL nian, iha Kuartél Jenerál Polisia Militár, Kintál Boot, iha loron 14 fulan Fevereiru tinan 2011.

“Atu asume kargu hanesan komandante iha instituisaun Polisia Militár, F-FDTL nian, todan teb-tebes, maibé importante liu mak tenke servisu maka’as hodi fó kontribuisaun ba Forsa Armada ida ne’e, tanba ita boot sira nia papél importante hodi ajuda komando F-FDTL sira atu kontrola soldadu sira, signifika katak, militár tenke fó ezemplu di’ak ba públiku, ita boot sira mak tenke kumpri uluk lei no disiplina”, hateten Sekretáriu Estadu Defeza iha ninia diskursu.

Iha fatin hanesan Komadante F-FDTL Majór Jenerál, Taur Matan Ruak, hateten “Loron ohin importante tebes ba Polisia Militár ne’ebé Estadu Maior FALINTIL-Forsa Defeza Timor-Leste deside atu haforsa tan unidade ida ne’e, eleva ninia estatutu, liu-liu iha nivél komando ninian, ne’ebé lidera hosi major ida. Ita hotu hein katak Majór Renilde Côrte-Real nu’udar komandante foun Polisia Militár nian bele komprova iha prátika katak  instituisaun ne’e konfia iha ninia lideransa, ninia prezensa bele fó apoiu no ajuda ami foti instituisaun ida ne’e ninia naran”, hatutan Taur Matan Ruak.