Governu Timor-Leste

Ministru Prezidénsia Konsellu Ministrus, Agio Pereira Iha loron 11 fulan-novembru tinan 2025, iha Palásiu Governu, fó pose ba Komisáriu foun sira Komisaun Funsaun Públika nian (KFP), Agapito da Conceição no Jorge Paiva Araújo, ne’ebé nomeia hosi Parlamentu Nasionál tuir Rezolusaun n. 47/2025, loron 15 fulan-outubru. 

Iha nia diskursu, Ministru Agio Pereira subliña katak tomada-de-pose "reforsa konfiansa entre instituisaun sira no reafirma prinsípiu esensiál ida hosi Estadu direitu demokrátiku: administrasaun públika ida ne'ebé serbí interese públiku".  

Governante ne’e destaka katak eskolla komisáriu sira hosi Parlamentu Nasionál "fó aktu lejitimidade ida ne’ebé forte no ekilíbriu institusionál ida ne'ebé saudavel", "hodi hatutan katak selebra serimónia ne’e “la'ós de'it bazeia ba perkursu méritu ida-idak nian, maibé mós kompromisu koletivu ida (….) atu kria funsaun públiku ida ne'ebé livre hosi polítika, profisionál, imparsiál no orientada ba rezultadus ". 

Agio Pereira subliña liután katak "nomeasaun, promosaun no avaliasaun sira tenke bazeia ba méritu, kompeténsia no integridade, la’ós bazeia ba afiliasaun polítika, prosimidade pesoál ka konveniénsia momentáneu", hodi fó-hanoin katak "KFP maka guardian ba fronteira étika ida-ne'e". 

Hodi refere ba responsabilidade sira Estadu nian ne'ebé aumenta daudaun, Ministru destaka nesesidade atu moderniza no profesionaliza administrasaun públika, no subliña katak "reforma administrasaun públika labele sai de'it slogan ida, maibé “ajenda serbisu ida” hodi garante "simplifikasaun regulatóriu, halakon formalidade sira ne'ebé la nesesáriu, hamenus númeru dokumentus, padroniza formulárius no orienta servisus públikus ba rezultadu". 

Ministru rekorda mós katak adezaun plena Timor-Leste nian ba ASEAN impoin responsabilidades ne'ebé boot no ezije aliñamentu funsaun públika nian ho "padraun rejionál governasaun, prestasaun servisus no interoperabilidade administrativa nian", hodi defende formasaun téknika no linguístika ba kuadrus Estadu nian no adosaun ba prátika administrativa moderna no dijitalizada sira. 

 “Administrasaun ida ne’ebé livre hosi polítika no profisionál maka garantia di’ak liu ba (…) polítika públika sira ne’ebé iha kualidade. Ho ida ne’e mak ita proteje konkistas ohin nian no prepara ba vitória sira aban nian”, nia hateten, hodi konklui ho mensajen konfiansa ida ba komisáriu foun sira, hodi dezeja ba sira “korajen no matenek” atu serbí Estadu ho integridade no dedikasaun, no mós renova “Governu nia kompromisu hodi serbí ho dignidade no efisiénsia". 

Agapito da Conceição no Jorge Paiva Araújo hato’o sira-nia kompromisu atu hala'o sira-nia knaar "ho imparsialidade, dedikasaun no responsabilidade maka'as, hodi konsidera nafatin intereses Estadu nian, Programa Governu no valór sira funsaun públika nian" no kompromete atu "serbisu iha defeza ba públiku nia di'ak no serbí komunidade no povu, ho imparsialidade, onestidade, profisionalizmu no korresaun, hodi salvaguarda interese nasaun nian sira ne’ebé aas liu".

Komisáriu foun na’in-rua ne’e agora hahú mandatu tinan lima, ho rejime dedikasaun eskluziva, tuir prevee ona sei remata iha loron 10 fulan-novembru tinan 2030, hodi hametin kompozisaun hosi Komisaun Funsaun Públika, órgaun ne’ebé responsavel ba promosaun méritu, imparsialidade no transparénsia iha jestaun rekursus umanus Estadu nian.

Serimónia ne’e hetan partisipasaun husi Vise-Prezidente Parlamentu Nasionál, Duarte Nunes, Provedór-Adjuntu Direitus Umanus no Justisa,  Rigoberto Monteiro, Komisáriu komisaun Anti-Korrupsaun, Rui Pereira, Prezidente KFP, Agostinho Letêncio de Deus, Komisárius Fausto Freitas da Silva no Komisárius Komisaun Funsaun Publika Anita T. R. de Jesus, José Telo Soares Cristóvão, Inspetór-Jerál Estadu, Francisco de Carvalho, Sekretáriu-Jerál Parlamentu Nasionál, Edgar Martins, Padre Bonaventura Magno, Xefe Gabinete Ministru Prezidénsia Konsellu Ministrus, Vítor  Maia, no Diretór-Jerál Administrasaun Prezidénsia Konsellu Ministru nian, Pedro Feno, no mós reprezentante sira seluk husi KFP no Prezidénsia Konsellu Ministrus.