Governu promove asesu ba informasaun iha área remota
Governu inaugura antena reseptora Rádiu Komunitária Lospalos (RKL) nian, ne’ebé harii ho apoiu Sekretaria Estadu Konsellu Ministru (SEKM) ne’ebé mak responsabiliza nu’udar autoridade legál ba meiu komunikasaun sosiál sira Estadu nian.
SEKM, liu husi Sentru Rádiu Komunitáriu (SRK) hala’o servisu espesiál ida hodi fó apoiu ba rádiu komunitária, atu nune’e bele garante no promove asesu informasaun ba populasaun ne’ebé hela iha área remota sira. Aleinde halo reparasaun sistemátika ba ekipamentu, SRK fó garantia mós kona-ba asisténsia téknika no apoiu lojístiku.
Jestór ba Rádiu Komunidade Lospalos, Nascimento Provencial, ne’ebé reprezenta Konsellu Rádiu no Voluntáriu sira hateten katak: “ami hakarak hato’o ami nia agradesimentu ba Governu liu-liu ba Sekretaria Estadu Konsellu Ministru ba nia apoiu torre foun ba Rádiu Komunidade Lospalos.
Iha okaziaun ida ne’e, Adjuntu Administradór distritu Lautem Júlio Canto fó nia agradesimentu ba Governu liu hosi SEKM tanba atensaun ne’ebé fó distritu ida ne’e.
Júlio Canto hatutan tan katak koalia kona-ba dezenvolvimentu meiu komunikasaun sosiál ne’e importante atu fó suporte ba dezenvolvimentu iha aspetu oin-oin: “Rádiu ne’e hanesan meiu komunikasaun ida importante hodi habelar informasaun kona-ba dezenvolvimentu no mós moris komunidade nian iha distritu ida ne’e ba populasaun”. Úniku meiu iha Distritu ida ne’e hodi fornese hato’o informasaun ba komunidade sira iha Lospalos mak Rádiu Komunidade Lospalos.
Relasiona ho liafuan hirak hateten iha leten, Diretór Jerál, Victor Maia, ne’ebé reprezenta Sekretáriu Estadu Konsellu Ministrus, hateten katak, rádiu komunidade ne’e importante tebes tanba tuir Polítika Nasionál Komunikasaun Sosiál, rádiu komunitária hanesan kanál ne’ebé importante atu habelar informasaun liu-liu kona-ba atividade Governu nian ba área remota sira. “Hau husu ba imi atu uza didi’ak antena ne’e hodi dezenvolve ita nia nasaun liu hosi informasaun iha área Lospalos”, tenik Diretór Jerál.
Rádiu Komunidade Lospalos harii hosi inisiativa komunidade distritu Lautem rasik iha loron 16 fulan Maiu 2002. Membru ka jornalista sira ne’ebé mak agora hala’o kna’ar iha RKL ne’e hotu-hotu hala’o sira nia servisu nu’udar voluntáriu. Rádiu Komunidade Lospalos kobre mós área distritu Viqueque no Baucau.
