Governu Timor-Leste

Primeiru-Ministru Kay Rala Xanana Gusmão, akompaña husi Ministru Obras Públikas, Samuel Marçal, lansa iha sábadu ida-ne’e, loron 8 fulan-novembru, projetu reabilitasaun ba estrada ne’ebé liga Seloi-Kraik, iha munisípiu Aileu, ba Tokoluli, iha postu administrativu Gleno, munisípiu Ermera, ho reafirma kompromisu Governu nian hodi hametin infraestrutura estratéjika iha territóriu nasionál tomak. 

Serimónia públika ne’ebé konta ho partisipasaun hosi membrus Governu, autoridade lokál sira no reprezentantes populasaun nian, ida-ne’e marka inísiu hosi projetu seluk ne’ebé integradu iha programa nasionál ba reabilitasaun no konstrusaun infraestrutura estrada nian, ne’ebé hala’o daudaun iha munisípiu oioin iha nasaun ne’e. Programa ida-ne’e ho objetivu atu hadi’a konektividade entre rejiaun sira, fasilita transporte sasán no ema, no mós impulsiona dezenvolvimentu ekonómiku lokál.

Durante nia intervensaun, Xefe Governu husu kolaborasaun populasaun ho ekipa téknika sira iha terrenu, subliña importánsia atu prezerva ekipamentus no garante ambiente ida ne’ebé favoravel ba ezekusaun serbisu.

Ministru Obras Públikas, Samuel Marçal, destaka katak projetu ne’e adjudika ba empreza nasionál ida hafoin konkursu internasionál ida, ida-ne'e hanesan ba dala uluk empreza timoroan ida halakon konkorrente estranjeiru sira, hodi hatudu kapasidade téknika no kompetitiva hosi setór nasionál.

Primeiru-Ministru subliña mós importánsia hosi Ajénsia Dezenvolvimentu Nasionál (ADN) mantein ninia papél fiskalizasaun no akompañamentu tékniku to’o projetu ne’e remata, hodi garante kualidade ezekusaun no aplikasaun di’ak hosi rekursus públikus.

Reabilitasaun estrada ne’e ho valór kontratu hamutuk dolar amerikanu millaun 14 no prazu ezekusaun tinan ida ho balun. Kontratu ne’e asina publikamente, iha populasaun nia oin, nu’udar sinál transparénsia no hametin partisipasaun sidadaun sira iha jestaun investimentu Estadu nian.

Prezidente Autoridade Munisipál Aileu nian, João Bosco dos Santos, hato’o nia agradesimentu ba Governu Konstitusionál da-9, hodi destaka rezultadu sira ne’ebé alkansa ona iha de’it tinan rua ninia mandatu. “Iha tinan rua de’it, Governu konsege lansa ona projetu ida-ne’e ne’ebé sei fó benefísiu ba komunidade Seloi-Kraik no Tokoluli, aleinde halo reabilitasaun ba estrada sira seluk hanesan iha Lekidoe. Lakleur tan, kondisaun estrada sei sai di’ak liután ba ema hotu”, nia afirma.

Iha serimónia ne’e konta ho prezensa husi Ministra Finansas, Santina Cardoso, Ministru Justisa, Sérgio Hornai, Ministru Agrikultura, Pekuária, Peska no Florestas, Marcos da Cruz, Ministru Planeamentu no Investimentu Estratéjiku, Gastão Francisco de Sousa, Vise-Ministru ba Infraestruturas, Júlio do Carmo, no mós membrus Governu no autoridade lokál sira seluk.

Governu Konstitusionál IX lansa ona projetu oioin kona-ba reabilitasaun no konstrusaun estrada nian iha munisípius, nu’udar parte ida hosi estratéjia ida atu dezenvolve infraestrutura esensiál sira ne’ebé apoia kreximentu ekonómiku no koezaun territoriál. Investimentu sira-ne'e reflete vizaun Governu Konstitusionál IX nian hodi moderniza rodoviária nasionál, garante mobilidade ne'ebé boot liu no promove dezenvolvimentu ida ne’ebé inkluzivu.

Iha loron hanesan, Ministru Obras Públikas, Samuel Marçal, reprezenta Governu, partisipa iha inaugurasaun Kapela Nossa Senhora Auxiliadora dos Cristãos, iha Saboria, Aileu, hamutuk ho Arsebispu Dili, D. Virgílio Kardeál do Carmo da Silva, SDB. Projetu reabilitasaun kapela ne’e hetan finansiamentu husi Governu, liu husi Ministériu Obras Públikas, ho montante dolar amerikanu rihun 218,8.