Governu Timor-Leste

“IV Governu Konstitusionál Timor-Leste, liu hosi Sekretaria Estadu Formasaun Profisionál no Empregu (SEFOPE), servisu hamutuk ho Ministériu Traballu Koreia-Sul nian hodi fasilita prosesu rekrutamentu ba servisu nain Timor Oan ne’ebé atu ba servisu iha Koreia-Sul”, tenik Sekretáriu Estadu ba Formasaun no Empregu, Bendito Freitas, iha serimónia despedida ba grupu traballu daruanuluk hamutuk nain 5 kompostu husi mane 4 no feto 1 ne’ebé servisu iha área fábrika no peska, iha edifisiu SEFOPE Kaikoli, Díli.

Sekretáriu Estadu hateten katak, “traballadór sira tenke servisu ho di’ak, nune’e bele hatudu ba komunidade internasionál ka liu-liu ba komunidade Koreanu sira katak Timor Oan mós iha kultura servisu nian ho responsabilidade no disipilina”.

Sekretáriu Estadu hatutan tan katak “bainhira iha kazu grave ruma ne’ebé traballadór sira karik enfrenta iha servisu fatin ka komunidade, bele informa ba Adidu Traballu, Señór Frederico Ferreira Matos iha Embaixada Timor-Leste ba Korea-Sul ka Carry Center ne’ebé servisu hamutuk  ho Governu Timor-Leste liu hosi SEFOPE no Ministériu Traballu Koreia nian”.

Iha biban ne’e mós Embassadór Koreia-Sul iha nia intervensaun hateten katak “traballadór sira sei enfrenta dezafiu boot mak kultura no klima ne’ebé la hanesan no husu ba traballadór sira atu buka aprende kultura no lian Koreia nian atu nune’e labele mosu dizintendimentu entre imi ho imi nia patraun sira”.