Governu Timor-Leste

Primeiru-Ministru Kay Rala Xanana Gusmão hala’o inaugurasaun no lansamentu ba projetu infraestruturas lubuk ida iha munisípiu Lautein iha loron 30 no 31 fulan-outubru. Projetu sira-ne'e inklui reabilitasaun ba seksaun estrada prinsipál sira, reforsu ba fornesimentu bee-moos, no hahú funsionamentu unidade desalinizasaun ida iha Illa Jaco. 

Iha lansamentu projetu sira-ne'e, Xefe Governu subliña katak infraestrutura báziku ne'ebé prevee ona iha Planu Estratéjiku Dezenvolvimentu Nasionál 2011–2030 nu’udar “baze ba dezenvolvimentu nasionál”, hodi destaka katak estrada sira ho kondisaun di'ak “loke dalan ba kreximentu turizmu, hasa'e ekonomia lokál no hasa'e rekursus nasaun nian ho sustentavel”. Primeiru-Ministru mós husu kolaborasaun komunidades nian ho ekipa sira iha terrenu hodi garante ezekusaun ho kualidade tuir prazu ne’ebé hatuur ona iha kontratu.

Iha loron 30 fulan-outubru, lansa ona projetu reabilitasaun ba parte entre rotunda Lautein no Com, ho distánsia kilómetru 19,76, ho prazu finalizasaun loron 365 no orsamentu dolar amerikanu millaun 11,2. Iha loron tuirmai, 31 fulan-outubru, Governu lansa reabilitasaun ba ligasaun entre Lautein no Lospalos, ho mós prazu loron 365, naruk kilómetru 27,98 no orsamentu dolar amerikanu millaun 18,8.

Iha serimónia rua ne'e, Ministru Obras Públikas, Samuel Marçal, agradese ba ekipa téknika sira-nia dedikasaun no subliña katak "rekursus povu nian no tenke jere ho rigorozu", hodi husu ba autoridade lokál sira no populasaun atu apoia serbisus ne’e no evita obstákulus.

Nune’e mós iha loron 31 fulan-outubru, lansa projetu ida atu hadi’a no habelar sistema abastesimentu bee-moos iha postu administrativu Lospalos, ho prazu ezekusaun loron 1.095 no orsamentu dolar amerikanu millaun 17. Investimentu ida-ne’e sei hasa’e disponibilidade bee-moos ba benefisiáriu 4000 resin, hodi reforsa servisu esensiál ida ba família sira no atividades ekonómikas munisípiu nian.

Iha loron hanesan, Primeiru-Ministru, akompaña husi Ministru Agrikultura, Pekuária, Peskas no Florestas, Marcos da Cruz, inaugura unidade desalinizasaun ida ne’ebé konverte tasi-been sai bee-moos iha Illa Jaco. Unidade ne’e instala ho apoiu husi Ministériu Agrikultura, Pekuária, Peskas no Florestas no mós Sekretaria Estadu Florestas. Sistema ne’ebé dezenvolve hosi sidadaun timoroan Luciano dos Santos Pereira, iha objetivu prinsipál atu garante disponibilidade bee ba fauna lokál – espesífikamente rusa maizumenus 400 ne’ebé moris iha illa ne’e, aleinde espésie fuik sira seluk – no apoia jestaun ambientál ba Parke Nasionál Nino Konis Santana. Governu koloka ofisiál seguransa florestál na’in-haat atu garante protesaun ba flora no fauna iha Illa Jaco no Parke Nasionál Nino Konis Santana, hodi apela ba populasaun no vizitante sira atu prezerva área protejida sira no tasi-ibun.

Prezidente Autoridade Munisípiu Lautein, Mélio de Jesus, agradese ba Primeiru-Ministru no Ezekutivu ne’ebé hahú ona projetu prinsipál hirak-ne’e no hato’o komunidade nia disponibilidade atu kolabora ho ativu ba susesu ninia ezekusaun.

Serimónias ne’e hetan partisipasaun hosi membrus Governu, reprezentantes hosi entidade nasionál no lokál sira, veteranus, lider komunitáriu no relijiozu sira, joven sira, estudantes, no populasaun ein-jerál.

Akompaña mós iha Facebook