Timor-Leste simu Medalla Osan Mean hosi Unidade Jornalista Indonézia
Vise-Primeiru-Ministru, José Luís Guterres ne’ebé reprezenta Timor-Leste, simu Medalla Osan mean nu’udar símbolu amizade nian hosi Unidade Jornalista Indonézia (PWI-Persastuan Wartawan Indonesia) iha serimónia loron Imprensa Nasionál Indonézia nian ba 65 iha Kupang-NTT, iha loron 9 fulan Fevereiru 2011.
“Hau partisipa iha eventu ida ne’e hodi reprezenta Primeiru-Ministru, Kay Rala Xanana Gusmão. Señor Primeiru-Ministru hato’o ninia saudasaun respeitu no apresia tebes ba imprensa públiku no Estadu Indonézia. Eventu ne’e mós hatudu espíritu amizade entre nasaun rua ne’e liu hosi kanál diplomasia imprensa nian”, hateten Vice-Primeiru-Ministru, José Luís Guterres, iha konferénsia ba imprensa.
Akompaña Vise-Primeiru-Ministru iha serimónia entrega medalla osan mean ne’e, mak Ministru Agrikultura no Peska, Mariano Assanami Sabino, Sekretáriu Estadu Juventude no Desportu, Miguel Manetelo no Kónsul Timor-Leste nian iha Kupang, Feliciano da Costa.
