Governu Timor-Leste

FALINTIL-Forsa Defeza Timor-Leste (F-FDTL) komemora ninia aniversáriu tranformasaun hosi FALINTIL ba F-FDTL, ba dala sanulu, iha Sentru Instrusaun  Komandante Nicolau Lobato, Kuartel Jenerál  Metinaro, Díli, iha loron 2 fulan Fevereiru.

“Ohin ita selebra ba dala sanulu aniversáriu transformasaun hosi forsa gerilla ba forsa armada, FALINTIL-FDTL. Eransa istória  Falintil nian, ne’ebé sira simu todan hahú iha tinan rihun ida atus sia, hitu nulu resin lima (1975) to’o tinan rihun ida atus sia, sianulu resin sia (1999), to’o momentu ne’ebé halo transformasaun FALINTIL ba F-FDTL sira mai ho  sira nia klamar no ran, sakrifísiu ne’ebé defísil tebes atu konta, sakrifísiu ne’ebé dook hosi familia la moris hamutuk ho familia hodi entrega an tomak ba mehi libertasaun nasaun ne’e. Hateten Prezidente Republika José Ramos-Horta iha nia diskursu.

Iha komemorasaun tinan ida ne’e instituisaun FALINTIL-Forsa Defeza Timor-Leste (F-FDTL) fó mós  Promosaun Postu  ba membru F-FDTL ha’at nulu resin tolu (43), hanesan;

- Tenente korenél ba Koronél, ema nain tolu,

- Majór ba Tenente Korenél, ema nain haat,

- Kapitaun ba Majór ema nain neen,

- Tenente ba Kapitaun, ema nain sanulu-resin-rua,

- Primeiru-Sarjentu ba sarjentu-adjuntu ema nain hitu,

- Soldadu ba Segundu-Sarjentu, ema nain ida no

- Soldadu ba Kabu hamutuk nain sanulu

Partisipa iha komemorasaun ne’e mak, Primeiru-Ministru, Kay Rala Xanana Gusmão;  Prezidente Parlamentu Nasionál, Fernando Lasama de Araújo; Reprezentante ONU iha Timor-Leste, Ameera Haq; Korpu Diplomátiku; Membru Governu no Membru Parlamentu Nasionál; Komisáriu PNTL, Komandante Longuinhos Monteiro; Eis Primeiru-Ministru, Mari Alkatiri no Eis Prezidente Parlamentu Nasionál Francisco Guterres “Lu Olo”.