Jornál Japonés The Mainichi halo Entrevista ba Ministru Agio Pereira kona-ba ninia vizaun Relasiona ho Adezaun Ofisiál Timor-Leste ba ASEAN
Ministru Prezidénsia Konsellu Ministrus, Agio Pereira, hala’o iha loron 23 fulan-outubru tinan 2025, entrevista ida ba jornál japonés The Mainichi, ida husi diáriu prinsipál tolu iha Japaun. Publikasaun husi reportajen ne’e prevee ona ba loron 26 fulan-outubru, loron ne’ebé formaliza Timor-Leste nia adezaun plena ba Asosiasaun Nasoins Sudeste Aziátiku (ASEAN). 
Entrevista ne’e nu’udar parte hosi konversa lubuk ida ho personalidade timoroan balu no ho objetivu atu aprezenta ba públiku japonés perspetivas nasionais kona-ba signifikadu husi adezaun Timor-Leste ba ASEAN no oportunidade sira ne’ebé adezaun ne’e reprezenta ba Timor-Leste.
Iha konversa ne’e, Ministru Agio Pereira destaka importánsia husi adezaun Timor-Leste ba ASEAN hanesan pasu naturál ida ba país ne’e atu integra plenamente iha bloku rejionál, iha ne’ebé nasaun ne’e naturalmente sai ninia parte. Nia subliña katak integrasaun ida-ne’e sei permite atu hametin kooperasaun, hasa’e dezenvolvimentu ekonómiku liuhosi integra Timor-Leste iha merkadu ida ne’ebé luan no favoravel ba kreximentu komersiál no industriál. 
Nia mós ko’alia kona-ba kestaun atuál sira, hanesan Greater Sunrise, importánsia husi estabilidade polítika no sosiál, no mós papél instituisaun nasionál nian iha konsolidasaun konfiansa públika.
Reportajen ne’e sei publika iha The Mainichi iha loron 26 fulan-outubru, hodi koinside ho serimónia ofisiál adezaun Timor-Leste nian ba ASEAN, ne’ebé sei hala’o durante Simeira ASEAN ba da-47 iha Malázia.
