Governu realiza konsulta públika ho autoridade lokál sira kona ba Polítika Planu Asaun Ekonomia Azúl 2025-2035
Governu Konstitusionál IX, ho lideransa Primeiru-Ministru, Kay Rala Xanana Gusmão nian, aprezenta iha loron 21 fulan-outubru 2025, Polítika no Planu Asaun ba Promosaun Ekonomia Marítima ida ne’ebé Reziliente no Sustentável iha Timor-Leste 2025–2035, ba Autoridades Munisipais, Lideres Komunitárius no parseiru estratéjiku sira seluk.
Konsulta públika durante loron ida, ne’ebé hala’o iha Ministériu Finansas iha Dili, nu’udar parte hosi sesaun lubuk ida ba auskultasaun públika, prezensiál no online, hodi promove diálogu inkluzivu ida kona-ba vizaun estratéjika Timor-Leste nian ba dezenvolvimentu ekonomia azúl ida ne’ebé reziliente no sustentável, tuir define ona iha Polítika no Planu Asaun Ekonomia Azúl 2025–2035.
Primeiru-Ministru Kay Rala Xanana Gusmão hato’o diskursu abertura iha sala ne’ebé nakonu ho partisipante maizumenus na’in-700, hodi subliña vizaun polítika no potensiál hosi Polítika no Planu Asaun Ekonomia Azul atu kontribui ba dezenvolvimentu nasionál ho forma integrada no inkluziva. Tuir mai aprezentasaun téknika sira ne'ebé detallada, hodi destaka prioridades no oportunidades Ekonomia Azul nian hodi dudu dezenvolvimentu nasionál, apoia biodiversidade no konservasaun tasi nian, no mós garante sustentabilidade ambientál ba tempu naruk.
Hafoin aprezentasaun sira, Autoridades Munisipais, Lideres Komunitárius no interveniente sira seluk partisipa iha sesaun pergunta no resposta no mós iha oportunidade atu hato’o kontribuisaun eskrita hodi garante katak sira-nia hanoin no prioridades hosi komunidade sira ne’ebé sira reprezenta reflete iha versaun finál polítika nian.
Governu Timor-Leste rekoñese knaar esensiál hosi lider lokál no komunidade sira hodi define futuru rekursus tasi-laran nasaun ne’e nian, no tanba ne’e enkoraja partisipasaun luan iha prosesu konsulta públika ida-ne’e.
Faze konsultas nian tuirmai kona-ba Polítika no Planu Asaun ba Promosaun Ekonomia Marítima ida ne’ebé Reziliente no Sustentável iha Timor-Leste 2025–2035 sei hala’o iha tinan 2026 tomak, ho lideransa Primeiru-Ministru Kay Rala Xanana Gusmão nian, ne’ebé kobre munisípiu hotu-hotu iha nasaun ne’e.
