Governu Timor-Leste

Vise-Primeiru-Ministru, Ministru Asuntus Ekonomikus no Ministru Turizmu no Ambiente, Francisco Kalbuadi Lay, partisipa iha edisaun da-40 husi Trade Expo Indonesia, ne'ebé hala'o iha Jakarta, husi loron 15 to'o 19 fulan-outubru, ne'ebé organiza husi Ministériu Komérsiu Indonézia nian. Governante ne'e akompaña husi Embaixadór Indonéziu ba Timor-Leste, Okto Dorinus Manik, no Embaixadór Timor-Leste nian ba Indonézia, Roberto Soares.

Iha feira ne'e konta ho prezensa husi membrus Governu indonéziu balun no reprezentante sira husi nasaun maizumenus 130. Realiza ho tema "Discover Indonesia’s Excellence: Trade Beyond Boundaries" ("Deskobre Exelénsia Indonézia nian: Komérsiu sein Fronteiras"), inisiativa ne'e ho objetivu atu promove produtus no servisus esportasaun Indonesia nian iha merkadu globál no hametin parseria ekonómika internasionál.

Iha sertame ne'e inklui pavillaun espesiál ida ne’ebé dedikadu ba empreza mikro, ki'ik no média sira, ho naran "BISA Ekspor" (Berani Inovasi, Siap Adaptasi Ekspor - "Korajen atu Halo Inovasaun, Prontidaun atu Adapta ba Esportasaun”), ne'ebé kria hodi apoia empreendedór sira iha preparasaun sira-nia produtus ba esportasaun.

Durante nia partisipasaun iha Trade Expo Indonesia, Vise-Primeiru-Ministru hala’o enkontru bilaterál ida ho Ministru Komérsiu Indonézia, Budi Santoso, iha ne’ebé nia hato’o nia agradesimentu no apresiasaun ba Prezidente Repúblika Indonézia, Prabowo Subianto — ne’ebé transmite liuhosi Ministru Komérsiu — ba apoiu kontínuu ne’ebé fó ba Timor-Leste iha prosesu adezaun ofisiál ba ASEAN, ne’ebé marka ona ba loron 26 fulan-outubru tinan 2025. 

Vise-Primeiru-Ministru subliña katak adezaun ba ASEAN loke oportunidade kooperasaun foun sira, liuliu iha setór privadu no konektividade rejionál, hodi hametin baze integrasaun ekonómika no komersiál sira entre Timor-Leste no nasaun Sudeste Aziátiku sira.

Governante timoroan ne’e mós hato’o agradesimentu ba konvite hodi partisipa iha edisaun ba dala 40 hosi Trade Expo Indonesia, ne’ebé konta ho partisipasaun hosi empreza timoroan sira ho dimensaun oioin, ne’ebé hetan apoiu hosi Embaixada Indonézia iha Dili no hosi Embaixada Timor-Leste iha Jakarta. Destaka mós simbolizmu hosi partisipasaun ida-ne’e, iha loron balu antes adezaun ofisiál Timor-Leste nian ba ASEAN.

Embaixadór Indonézia ba Timor-Leste, Okto Dorinus Manik, agradese ba prezensa hosi Vise-Primeiru-Ministru no destaka kompromisu Governu Timor-Leste nian atu hametin relasoins ekonómikas bilaterais. Embaixadór Timor-Leste ba Indonézia, Roberto Soares, elojia mós esforsu hosi emprezáriu timoroan sira ne'ebé marka prezensa iha feira ne’e, hodi refere katak sira-nia partisipasaun kontribui atu hasa'e vizibilidade nasaun nian  no hametin kooperasaun emprezariál entre nasaun rua ne'e.

Prezidente Kámara Komérsiu no Indústria Timor-Leste (CCI-TL, sigla iha lian Portugés) hosi Munisípiu Ermera, Luís Alves Tilman, konsidera katak partisipasaun iha Trade Expo Indonesia nu’udar oportunidade importante ida hodi koñese liután kona-ba dezenvolvimentu ekonómiku no industriál Indonézia nian no promove parserias emprezariais entre nasaun rua ne’e.

Trade Expo Indonesia hanesan feira komersiál ida ne’ebé boot liu iha Sudeste Aziátiku, ne’ebé serve hanesan plataforma ida ba promosaun no interkámbiu ekonómiku entre nasaun sira iha rejiaun ne’e no sira-nia parseiru internasionál sira.