Timor-Leste Aprezenta Progresu ne’ebé Alkansa ona iha Prosesu Adezaun ba Akordu kona-ba Kontratus Públikus Organizasaun Mundiál Komérsiu nian
Timor-Leste partisipa, iha loron 15 fulan-outubru tinan 2025, iha sesaun formál no informál sira hosi Komité Organizasaun Mundiál Komérsiu (OMC, sigla iha lian Portugés) nian relasiona ho Akordu kona-ba Kontratus Públikus (GPA), ne’ebé hala’o iha Jenebra, Suisa. Enkontru ida-ne'e marka enkontru formál ba dala 100 hosi Komité dezde adosaun GPA OMK nian ba dahuluk iha tinan 1994.
Durante sesaun ne’e, Embaixadór António da Conceição, Reprezentante Permanente Timor-Leste nian iha OMK, aprezenta progresu ne’ebé Timor-Leste hetan iha prosesu adezaun ba Akordu kona-ba Kontratus Públikus, hodi reafirma kompromisu Governu nian atu adota padraun internasionál kona-ba transparénsia, efisiénsia no boa governasaun iha kontratasoins públikas.
Iha nia diskursu, Embaixadór destaka katak, dezde komunikasaun ofisiál ikus ba Komité iha fulan-Setembru 2025, Governu serbisu besik ona ho parseiru dezenvolvimentu sira hodi implementa asaun kapasitasaun téknika oioin ne'ebé alvu ba funsionárius hosi ministériu no instituisaun xave sira. 
Inisiativa sira-ne’e krusiál tebes hodi hametin komprensaun institusionál kona-ba enkuadramentu GPA no fornese ba ekipa téknika nasionál sira ferramenta no metodolojia nesesáriu sira hodi prepara Oferta Asesu ba Merkadu Timor-Leste nian.
Governu oras ne’e daudaun iha ona faze ikus hodi aprova kriasaun formál Grupu Traballu Tékniku kona-ba Adezaun ba GPA, órgaun interministeriál ida ne’ebé sei sai nu’udar mekanizmu koordenasaun formál no konsulta interna iha prosesu preparasaun Oferta Asesu ba Merkadu. Hafoin ninia kriasaun formál, Grupu Traballu ne’e sei hahú ninia atividade operasionál sira.
Tuir kalendáriu ne’ebé estabelese ona, Timor-Leste prevee atu kompleta kriasaun formál ba Grupu Traballu Tékniku to’o tinan 2025 nia rohan no submete ninia Oferta Asesu ba Merkadu durante semestre dahuluk tinan 2026 nian.
Governu konsidera adezaun ba GPA hanesan komponente importante ida ba ninia estratéjia ne’ebé luan liu ba integrasaun iha sistema komersiál internasionál, hodi reforsa kompromisu nasaun nian ba transparénsia, boa governasaun no kompetitividade ekonómika.
