Ferramenta Dijitál Foun Reforsa Esforsu Nasionál hodi Prevene no Kombate Tráfiku Umanu
Governu, liuhosi Ministériu Justisa, ofisiálmente lansa website Komisaun Luta Kontra Tráfiku Umanu (KLATU, akrónimu iha lian Tetun) — https://klatu.mj.gov.tl — iha serimónia ida ne’ebé hala’o iha loron 9 fulan-outubru 2025, iha auditóriu Ministériu Justisa nian, iha Dili. 
Plataforma dijitál foun nia objetivu prinsipál maka reforsa prevensaun no kombate tráfiku umanu, fasilita asesu ba informasaun, no mós promove koordenasaun boot liu entre instituisaun públika sira, organizasaun sosiedade sivíl sira no parseiru internasionál sira. Website ne’e fornese rekursus apoiu ba vítima, lejizlasaun relevante, polítika nasionál, materiál sensibilizasaun no mekanizmus denúnsia nian, hodi kontribui ba resposta ida ne’ebé koordenada no efetivu liu ba tipu krime ida-ne’e.
Iha lansamentu ofisiál, Ministru Justisa, Sérgio de Jesus Fernandes da Costa Hornai, destaka katak website KLATU nian reprezenta “ferramenta moderna ida atu proteje vítima sira no garante transparénsia iha asaun sira Estadu nian hodi kombate tráfiku umanu”.
"Plataforma ida-ne'e reflete kompromisu hosi Governu hodi garante katak sidadaun tomak iha asesu ba informasaun, mekanizmus denúnsia no rede sira apoiu nian ne'ebé nesesáriu hodi kombate krime ida ne'ebé kontinua ameasa dignidade ema nian. Ne’e la’ós de'it ferramenta teknolójika ida, ne’e hanesan pasu firme ida hodi defende direitus ema nian no promove justisa", hatete hosi Ministru.
Ministru mós subliña katak website ne’e sei fasilita fahe dadus no asesu ba informasaun atualizadu entre entidade sira ne’ebé envolve, hodi permite hadi’a koordenasaun no akompañamentu ba kazu sira ne’ebé rejista ona. Nia mós rekomenda atu plataforma ne’e disponivel iha lian tetun, portugés no indonézia, no mós inklui liña direta ba denúnsia no husu ajuda.
Diretór Nasionál Teknolojia Informasaun hosi Ministériu Justisa, Sebastião Domingos Freitas Belo, aprezenta pájina web nia karakterístika prinsipál sira, hodi esplika katak pájina web ne’e dezeña atu fasil ba utilizasaun no asesivel iha territóriu nasionál tomak, no mós ba timoroan sira ne’ebé hela iha estranjeiru.
Serimónia ne’e hetan partisipasaun husi Sekretária Estadu ba Igualdade, Elvina de Sousa Carvalho; Xefe Misaun hosi Organizasaun Internasionál ba Migrasaun (IOM), Jewel Trishia Ali; no reprezentantes Ajénsia Teknolojia Informasaun no Komunikasaun (TIC Timor I.P) nian. Marka prezensa mós reprezentante sira husi Ministériu Transportes no Komunikasoins; Defensór Públiku-Jerál, Câncio Xavier; Diretór-Jerál Interinu Servisu Rejistu no Notariadu; Diretór-Jerál Administrasaun Ministériu Justisa; no Diretór Nasionál PCIC nian. Marka prezensa mós Embaixadór sira hosi Estadus Unidus, Austrália no Indonézia, no mós reprezentante sira seluk hosi parseiru dezenvolvimentu sira no organizasaun sosiedade sivíl sira.
