Koordenadora Grupu Traballu ba Reforma Setór Justisa fasilita akordu kooperasaun entre Fakuldade Direitu UNTL no Universidade Lisboa
Ho apoiu hosi Koordenadora Grupu Traballu ba Reforma Setór Justisa Gabinete Primeiru-Ministru nian, Lúcia Lobato, asina ona Akordu Kooperasaun ida entre Fakuldade Direitu hosi Universidade Nasionál Timor Lorosa’e (UNTL) no Fakuldade Direitu hosi Universidade Lisboa (FDUL), iha loron 29 fulan-setembru, iha Lizboa.
Iha asinatura ba akordu ne’e, Fakuldade Direitu UNTL ne’ebé reprezenta husi ninia Dekanu, José Tomás Alves, no FDUL husi ninia Diretór, Eduardo Vera-Cruz Pinto. Protokolu ne’e mós asina hosi Reitór UNTL, João Soares Martins, no Prezidente Institutu Kooperasaun Jurídika hosi FDUL, Fernando Loureiro Bastos.
Dokumentu importante ida-ne’e estabelese baze atu haburas no hametin kolaborasaun entre instituisaun ensinu superiór rua ne’e iha área Direitu nian, hodi prevee, entre inisiativa sira seluk, halo interkámbiu profesór no peskizadór sira, produsaun manuál estudu ida kona-ba Direitu Timór nian, no mós organizasaun klase hamutuk, konferénsia, semináriu, no kursu mestradu no mós doutoramentu, tantu diretamente no mós online. 
Hein katak iha tempu badak sei asina protokolus ne'ebé hanesan ho tan fakuldade Direitu sira seluk iha Portugál.
Nu’udar parte atu kumpre Programa Governu nian, no hodi hatán ba falta sira ne’ebé identifika ona iha relatóriu “Ba Justisa ida ne’ebé Di’ak Liu” — liuliu falta rekursus umanus no difikuldade sériu no lakuna sira iha ensinu Direitu iha Timor-Leste — hala’o ona liña asaun simultáneu no komplementár, iha ne’ebé rua ne’e tenke kumpre iha prazu lejizlatura ida-ne’e nia laran, ka, tinan lima:
1. Haruka estudantes direitu nian ba universidade portugeza sira;
2. Hametin kapasidade Fakuldade Direitu UNTL nian, hodi bele garante, iha tempu badak, ensinu superiór iha área Direitu ho kualidade aas iha territóriu nasionál. 
Kontribuisaun hosi bolseiru atuál sira ne’ebé estuda iha rai-li’ur mós sei sai esensiál atu alkansa objetivu hodi rezolve falta rekursus umanus kualifikadus iha setór justisa no ensinu direitu iha médiu no longu prazu, hodi nune’e garante sustentabilidade no optimizasaun hosi rekursus ne’ebé iha.
