Governu Kontinua Reforsa Infraestruturas Rurais ho Reabilitasaun ba Estrada Luak-Betanu iha Manufahi
Primeiru-Ministru, Kay Rala Xanana Gusmão, ne’ebé akompaña husi Ministru Obras Públikas, Samuel Marçal, iha loron 28 fulan-setembru tinan 2025, prezide serimónia lansamentu ba projetu reabilitasaun estrada ne’ebé liga Luak ba Betanu, iha Postu Administrativu Same, Munisípiu Manufahi. 
Iha okaziaun ne’e, Xefe Governu destaka katak projetu sira ba dezenvolvimentu ne’e la’o hela tuir vizaun no planu ne’ebé define ona iha Planu Estratéjiku Dezenvolvimentu Nasionál 2011-2030, ne’ebé estabelese nu’udar pilár esensiál ba konstrusaun infraestruturas bázikas iha área bee, estrada, saúde no edukasaun. Primeiru-Ministru apela ba populasaun Manufahi atu akompaña didi’ak projetu ne’e nia implementasaun no kontribui ba nia realizasaun, hodi evita asaun sira ne’ebé bele atraza serbisu, nune’e obra ne’e bele remata tuir tempu no lori benefísiu ba komunidade tomak.
Primeiru-Ministru mós subliña katak empreza ne’ebé responsavel tenke ezekuta obra ne’e ho kualidade no responsabilidade, tanba ne’e nu’udar infraestrutura ida ne’ebé importante, ne’ebé sei serbí populasaun iha tinan barak nia laran.
Ministru Obras Públikas afirma katak, dezde simu pose, Primeiru-Ministru husu ba nia atu fó prioridade ba infraestrutura iha área rurál sira atu nune’e bele garante kondisaun moris ne’ebé di’ak-liu ba povu ne’ebé luta maka’as tebes ba país ne’e.
Prezidente Autoridade Munisípiu Manufahi, Luís Tavares, lori populasaun nia naran, hato’o ninia agradesimentu ba Governu Konstitusionál IX, hodi subliña katak investimentu ida-ne’e responde ba aspirasaun ida ne’ebé iha kleur ona. Nia mós destaka importánsia hosi estrada ne’e hodi permite populasaun sira atu transporta sira-nia produtus ba merkadus, no nune'e hametin ekonomia lokál.
Estrada Luak-Betanu halo parte iha Estrada Nasionál A14 no nu’udar ligasaun vitál ida entre Same, Luak no Betanu, hodi permite hasa’e komérsiu lokál, fasilita transporte produtu agríkola, atrai investimentu no hadi’a mobilidade rezidente sira nian iha munisípiu Manufahi.
Projetu ne’e fahe ba parte rua, ho kontratu ketak ne’ebé finansia husi Ministériu Obras Públikas. Projetu dahuluk, refere ba parte ida ho nia naruk 5,1 km, ho valór dolar amerikanu millaun 4,98 no iha prazu ezekusaun tinan ida. Projetu daruak, relasiona ho parte ida ho nia naruk 4,05 km, ho nia orsamentu ho dolar amerikanu millaun 4,83 no iha mós prazu ezekusaun tinan ida.
Investimentu ida-ne’e halo parte iha vizaun Governu Konstitusionál IX nian ba setór infraestruturas, ne’ebé konsidera área ida-ne’e esensiál ba dezenvolvimentu ekonómiku no sosiál país nian. Programa Governu ne’e subliña katak infraestruturas maka baze atu sustenta produtividade, kria empregu no dinamiza setór privadu. Hafoin períodu estagnasaun ekonómika no diminuisaun iha investimentu públiku, Ezekutivu ne’e lansa fila-fali reforma estruturál no aumenta investimentu iha infraestruturas importantes iha Timor-Leste laran tomak, ho objetivu atu hadi’a mobilidade no kondisaun moris ba populasaun, reativa ekonomia no garante dezenvolvimentu ne’ebé ekilibradu no sustentável iha territóriu nasionál tomak. Ho forma integradu, Ministériu Obras Públikas promove ona projetus iha Timor-Leste laran tomak ne’ebé inklui reabilitasaun no konstrusaun rede rodoviária no pontes, eletrifikasaun nasionál no diversifikasaun enerjétika, implementasaun sistema abastesimentu bee no saneamentu no mós reforsu drenajen no protesaun hasoru dezastres naturais, iha planu modernizasaun no expansaun ida ne’ebé abranjente ho objetivu atu asegura bazes materiais ba dezenvolvimentu agora no futuru Timor-Leste nian.
Serimónia ne’e konta ho bénsaun husi Pároku Parókia Nossa Senhora de Assunção de Same, Padre Albino Marques, no marka prezensa hosi Primeiru-Ministru no Ministru Obras Públikas, Vise-Ministru Asuntus Parlamentares, Adérito Hugo, Vise-Ministru Administrasaun Estatál, Jacinto Rigoberto Gomes de Deus, Vise-Ministru Infraestruturas, Júlio do Carmo, membrus Parlamentu Nasionál, téknikus osi Ministériu Obras Públikas, reprezentantes hosi emprezas kontratadas, veteranus, autoridade munisipál no lokál sira, no mós populasaun hosi rejiaun ne’e.
