Timor-Leste karik sei integra iha Forsa Manutensaun Pás nian Iha Líbanu
Sekretáriu Estadu Defeza, Júlio Tomás Pinto, hala’o vizita ba Portugál, iha inísiu fulan Janeiru tinan ne’e hodi estabelese kontaktu atu Timor-Leste bele tama mós iha ekipa operasionál portugés nian ba estabilizasaun pás iha Líbanu.
“Timor-Leste hakarak atu partisipa iha Operasaun Manutensaun Pás iha Líbanu. Ita keta haluha katak hafoin liu tiha referendu, komunidade internasionál fó sira nia kontribuisaun maka’as ba misaun pás iha Timor-Leste to’o ohin loron. Tan ne’e, hanesan Nasaun soberanu ida ne’ebé iha responsabilidade ba pás no estabilidade iha reziaun no internasionál, Timor-Leste mós iha obrigasaun atu tama iha misaun Nasoins Unidas nian iha Líbanu” esplika Sekretáriu Estadu Defeza, Júlio Tomas Pinto
Proposta ne’e hetan apoiu hosi Portugál, hanesan Diretór-Jerál ba Polítika Defeza Nasionál, Luís Faro Ramos, afirma katak ho esperiénsia iha matéria ba misaun pás nian, Portugál konkorda atu membru F-FDTL integra mós iha sira nia kontijente.
Sekretaria Estadu Defeza Nasionál no Asuntu Tasi Portugal nian, sei haruka karta ofisiál ida ba Ministru Defeza no Seguransa Timor-Leste nian, Kay Rala Xanana Gusmão, atu formaliza integrasaun militár timor-oan nian iha Kontijente Portugés ba Operasaun Manutensaun ba Pás iha Líbanu. Autoridade Portugés nian ne’e mós hateten, sira sei kontinua fó apoiu nafatin ba Timor-Leste.
