Ministra Solidariedade Sosiál no Inkluzaun Reprezenta Timor-Leste iha Forum Sosiál Portu 2025
Ministra Solidariedade Sosiál no Inkluzaun, Verónica das Dores, partisipa iha Forum Sosiál Portu 2025, ne’ebé hala’o iha loron 18 no 19 fulan-setembru iha sidade Portu. Eventu ne'e hetan partisipasaun hosi partisipantes internasionais liu 200, inklui lider polítiku sira, parseiru sosiál sira no reprezentantes sosiedade sivíl nian, ho tema "Empregu ho Kualidade iha Europa Sosiál ida ne’ebé Kompetitiva". Enkontru altu nivel ida-ne’e, organiza husi Governu Portugal ho apoiu husi Komisaun Europeia, ho objetivu atu promove diskusaun kona-ba kriasaun empregu ne’ebé iha kualidade, ho saláriu di’ak, ekilíbriu entre vida profisionál no familiár, kondisaun servisu ne’ebé di’ak, no mós protesaun sosiál ne’ebé adekuadu. 
Diskusaun sira loron dahuluk nian envolve liuliu parseiru sosiál europeu sira, enkuantu loron daruak dedika ba diálogu entre ema sira ne'ebé foti desizaun polítika. Iha Forum ne’e hetan partisipasaun husi reprezentantes Estadus-Membrus Uniaun Europeia, nasaun kandidatu sira, paízes Asosiasaun Europeia Komérsiu Livre (EFTA), Nasaun sira Komunidade País Lian Portugés (CPLP) nian, reprezentantes altu nivel husi instituisoins europeias, parseirus sosiais, organizasoins sosiedade sivíl no entidade internasionál sira, inklui Organizasaun Traballu Internasionál.
Ministra Solidariedade Sosiál no Inkluzaun, Verónica das Dores, partisipa iha Forum Sosiál Portu 2025, konsidera hanesan plataforma internasionál importante ida ba debate polítiku-sosiál no dezenvolvimentu sustentável. Iha biban ida-ne’e, Timor-Leste marka prezensa nu’udar membru ativu Komunidade País Lian Portugés (CPLP) nian, hodi reforsa ninia kompromisu ba solidariedade iha ámbitu Planu Asaun Sosiál Forum nian, liuliu kona-ba promosaun direitus no valores universais hodi garante liberdade no justisa sosiál.
Durante sesaun altu nivel ne’e, Ministra Verónica das Dores afirma katak Timor-Leste nia partisipasaun, hanesan nasaun membru CPLP nian, nu’udar oportunidade atu kontribui ba komunidade internasionál nia esforsu hodi promove empregu ho kualidade, hametin direitus sosiais no promove inkluzaun. Ministra subliña katak atu asegura moris-di’ak povu nian presiza integrasaun polítika ida ne’ebé justa, hodi rekorda katak traballadór barak maka kontinua hasoru situasaun injustisa nian. Tanba ne'e nia defende mobilidade sosiál nu'udar instrumentu fundamentál ba progresu sosioekonómiku, tuir prinsípiu sira igualdade, justisa no dezenvolvimentu sustentável nian.
Entre partisipante sira Forum nian maka Prezidente Konsellu Europeu, António Costa; Primeiru-Ministru Portugál, Luís Montenegro; Vise-Prezidente Komisaun Europeia nian, Roxana Mînzatu; no mós ministru sira hosi nasaun 23 no reprezentantes hosi organizasaun internasionál sira.
Durante eventu ne’e, Ministra Verónica das Dores hasoru malu ho Ministra Traballu, Solidariedade no Seguransa Sosiál Portugal nian, Rosário Palma Ramalho, akompaña husi Sekretária Estadu Seguransa Sosiál, Filipa Lima. Enkontru ne’e fó dalan ba aprofundamentu lasu kooperasaun entre ministériu rua ne’e, ho foku ba kombate pobreza no hametin kapasidades instituisoins no ekipamentus seguransa sosiál nian.
