Timor-Leste Partisipa iha Semana Kulturál Xina no País Lian Portugés ba da-17
Timor-Leste partisipa iha edisaun ba da-17 hosi Semana Kulturál Xina no País Lian Portugés, ne'ebé organiza hosi Sekretariadu Permanente Forum Makau, ne'ebé hala'o hosi loron 26 fulan-setembru to'o loron 18 fulan-novembru tinan 2025. Ho tema "Sidade Tolu - Resonánsia Kulturál: Maximiza efeitus senérjikus husi markas kulturais sino-luzófonas”, edisaun ida-ne'e hala'o, ba dala uluk, iha fatin tolu — Makau, Zhongshan (provínsia Guangdong) no Pekin — hodi habelar dimensaun eventu no ámbitu kooperasaun kulturál sino-luzófona nian. 
Semana Kulturál ne’e halo parte iha Planu Asaun ba Kooperasaun Ekonómika no Komersiál Forum Makau no destaka papél Makau nian hanesan "Plataforma Ida, Baze Ida", ne’ebé liga Oriente no Osidente, hodi promove interkámbiu kulturál, entendimentu mútuu no aproximasaun entre povu sira.
Reprezentasaun timoroan tinan ne'e nian inklui ho prezensa husi banda muzikál Salurik, ne'ebé sei halo atuasaun iha Makau, Zhongshan no Pekin, no mós artezaun Joaquim Surameli, eskultór timoroan ida ne'ebé sei aprezenta nia obra sira iha Feira de Artesanato da Doca dos Pescadores, iha Makau.
Programa Semana Kulturál ne’e inklui espetákulu husi múzika no dansa, feira artezanatu, demonstrasaun gastronómika, ezibisaun hosi obras audiovizuais lansamentu livrus, espozisaun ba artes plástikas, workshops no atividades interativas. Serimónia abertura sei hala’o iha loron 26 fulan-setembru iha Doca dos Pescadores, iha Makau, hodi halibur grupu artístiku sira hosi Xina no país sira ne’ebé ko’alia lian portugés.
