Vise-Primeiru-Ministru Mariano Assanami Sabino halo Vizita Ofisiál ba Tailándia
Husi loron 8 to’o loron 11 fulan-setembru tinan 2025, Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, hala’o vizita ofisiál ida ba Reinu Tailándia, ne’ebé ho objetivu atu hametin kooperasaun bilaterál no fahe esperiénsia iha ámbitu dezenvolvimentu rurál, ekonómiku no sosiál.
Durante ninia estadia, Vise-Primeiru-Ministru hasoru malu ho Sekretáriu Ministru Negósius Estranjeirus Tailándia, Chutintorn Gongsakdi, ne’ebé nia agradese ba ninia apoiu iha prosesu adezaun Timor-Leste nian nu’udar membru plenu diretu hosi Asosiasaun Nasoins Sudeste Aziátiku (ASEAN). 
Iha enkontru ne’e, governantes hosi nasaun rua ne’e fahe esperiénsia no prátika di’ak-liu, no mós oportunidade ba kooperasaun iha área oioin, hanesan agrikultura, pekuária, akikultura, peska, turizmu no indústria estratéjika sira, hodi konsidera sira-nia potensiál atu hasa’e kreximentu ekonómiku no hadi’a populasaun sira-nia moris-di’ak.
Chutintorn Gongsakdi hatudu vontade hosi Tailándia hodi kontinua apoia Timor-Leste atu bele garante prosesu adezaun ba ASEAN " ida ne’ebé di'ak, inkluzivu no efikás", liuhosi kapasitasaun institusionál, formasaun diplomátika no kooperasaun iha área oioin.
Enkontru ne’e hetan partisipasaun husi reprezentante governu no diplomátiku sira husi Tailándia, no mós Xefe Gabinete no téknikus espesializadus husi Ministériu Dezenvolvimentu Rurál no Abitasaun Komunitária Timor-Leste.
Nu’udar parte husi ninia vizita ofisiál ba Tailándia, Vise-Primeiru-Ministru vizita mós Sentru Dezenvolvimentu Ázia-Pasífiku kona-ba Defisiénsia (APCD, sigla iha lian Inglés), instituisaun ne’ebé rekoñesidu ba ninia serbisu hodi promove direitus no moris-di’ak ema ho defisiénsia sira-nian.
Vizita ne’e fó oportunidade atu aprende kona-ba formasaun profisionál no inisiativa empreendedorizmu sosiál ne’ebé ho objetivu atu hametin inkluzaun, promove partisipasaun ativa ema ho defisiénsia iha ekonomia no kria modelu dezenvolvimentu sustentável. Mariano Assanami Sabino destaka APCD nu’udar inspirasaun importante ida ba hametin polítika sosiál no inkluzaun iha Timor-Leste.
Vizita ofisiál ida-ne’e kontribui ba konsolidasaun amizade no kooperasaun entre Timor-Leste no Tailándia, liuliu iha área dezenvolvimentu sosiál no empoderamentu ba grupu vulneravel sira.
Hafoin vizita ba Tailándia, Vise-Primeiru-Ministru halo viajen ba Xina no tuirmai ba Koreia-Súl, iha ne’ebé, hosi loron 16 to’o 19 fulan-Setembru, partisipa Sorumutu Ministeriál Globál Saemaul tinan 2025 no Forum Lideransa Globál Saemaul (GSLF) iha Gyeongju, Repúblika Koreia. Movimentu Saemaul, ne’ebé lansa iha Koreia-Súl iha dékada tinan 1970, nu’udar referénsia internasionál ida iha área dezenvolvimentu komunitáriu no fortalesimentu kapasidade lokál.
