Timor-Leste hakarak tau Adidu Defeza nian Iha Portugál
Sekretáriu Estadu Defeza, Júlio Tomás Pinto, akompaña hosi Koronél Falur Rate Laek, iha inísiu tinan ida ne’e, hala’o sorumutu ho Sekretáriu Estadu Negósiu Estranjeiru no Kooperasaun Portugál nian, João Carvinho, iha Lisboa.
Durante sorumutu iha asuntu tolu mak diskute; hanesan, kona-ba adidu defeza Timor-Leste nian iha Portugál, kona-ba Manutensaun ba páz no Sentru lian portugés iha Metinaro.
Sekretáriu Estadu Dezefa, Júlio Tomás Pinto, hateten, “Asuntu adidu defeza Timor-Leste nian iha Portugál importante duni, tanba ofisiál F-FDTL barak mak tuir kursu iha Portugál no sira hateten presiza hetan ta’an apoiu, liu apoiu ne’ebé mak Embaxada Timor-Leste nian oferese ona. Sekretáriu Estadu Negósiu Estranjeiru no Kooperasaun Portugál nian, konkorda ho hanoin ida ne’e. Maibé, asuntu ne’e sei diskute ho Ministru Defeza no Siguransa Timor-Leste, Kay Rala Xanana Gusmão nomós Xefe Estadu Major Jenerál Taur Matan Ruak, atu nune’e iha tempu besik bele halo ona selesaun ba Adidu Defeza nian ba Portugál”, hatutan Júlio Tomás Pinto.
