Sorumutu kona-ba Kriasaun Orden Enjeñeiru Timor-Leste
Ministru Prezidénsia Konsellu Ministrus, Agio Pereira, iha loron 5 fulan-setembru tinan 2025, hasoru malu ho Prezidente Asosiasaun Timorense Enjeñeiru Sivíl (ATEC, akrónimu iha lian Portugés), Benjamim Hopffer Martins, Vise-Prezidente Orden Enjeñeiru Portugál (OEP), Jorge Marçal Liça, Prezidente Rejiaun Sentru OEP, Isabel Cristina Gaspar Pestana da Lança, no enjeñeiru nasionál sira iha Palásiu Governu, Dili, hodi analiza prosesu kriasaun Orden Enjeñeiru Timor-Leste nian. Inisiativa ne’ebé dezenvolve hela ho apoiu hosi Orden Enjeñeiru Portugál nian, ho objetivu atu fó ba nasaun ne’e enkuadramentu regulatóriu ida ba profisaun ne’e, hodi reforsa kualidade, étika no valorizasaun ba setór enjeñaria. 
Durante sorumutu ne’e, Ministru Agio Pereira destaka importánsia hosi inisiativa, rekoñese kompromisu hosi entidade sira ne’ebé envolve no manifesta nia apoiu ba implementasaun hosi kriasaun Orden Enjeñeiru Timor-Leste nian. 
Kriasaun Orden Enjeñeiru Timor-Leste ne’e akontese hafoin tama iha vigór Lei n. 4/2022, loron 23 fulan-marsu, ne’ebé estabelese Rejime Jurídiku ba Asosiasoins Públikas Profisionais, no ho objetivu atu fó enkuadramentu regulatóriu ida ba profisaun enjeñaria nian iha país ne’e, atu nune’e bele garante padraun aas ba kualidade, kompeténsia no étika iha prátika enjeñaria nian.
Durante sorumutu ne’e destaka importánsia hosi prosesu ida-ne’e hodi garante valorizasaun ba enjeñeiru nasionál sira, proteje direitu profisionál sira no promove konfiansa públiku nian ba profisaun ne’e. Futuru Orden ne’e sei hametin mós kualidade ensinu enjeñaria nian, asegura mekanizmu sira atribuisaun títulu profisionál no regulamentasaun nian, insentiva formasaun kontínua no fasilita rekoñesimentu resíproku hosi profisionál sira, hodi nune'e kontribui ba hadi'a setór ne’e no dezenvolvimentu ekonómiku no sosiál país nian.
Kooperasaun ne'e estabelese ho Orden Enjeñeiru Portugál nian permite ona atu hala'o sorumutu regular sira ho grupu traballu no dezenvolvimentu hosi proposta estatutu ida no mós regulamentu ingresu nian. Serbisu ne’ebé hala’o hela mobiliza enjeñeiru sira hosi espesialidade no instituisaun oioin, ho apoiu tékniku-jurídiku hosi Orden Enjeñeiru Portugál no hosi Ministériu Obras Públikas Timor-Leste nian. 
Asosiasaun Timorense Enjeñeiru Sivíl, ho apoiu hosi Informasaun, Komunikasaun no Teknolojia Timor-Leste nian (ICTTL, sigla iha lian Portugés), aban, loron 06 fulan-setembru sei organiza konferénsia ida, iha Hotel Novo Turismo, Dili, hodi ko’alia kona-ba setór ne’e no kriasaun ba futuru Orden Enjeñeiru Timor-Leste nian.
