Governu entrega uma 34 ba distritu Díli
Iha loron 30 fulan Dezembru tinan 2010, Ministériu Solidariedade Sosiál (MSS), entrega tiha ona uma sosiál nian hamutuk 34, ba distritu Díli.
Konstrusaun projetu uma hirak ne’e nian, destina ba ema ki’ak sira, konstrusaun ne’e hahú iha tinan 2009, remata iha tinan 2010, uma sosiál hirak ne’e iha país laran tomak hamutuk atus haat limanulu (450). Uma hirak ne’ebé entrega ona ba benefísiáriu sira mak iha distritu Covalima, Ainaro, Manufahi, Ermera, Maliana, Liquisá, Baukau, Viqueque no Lospalos. Sei iha uma balun mak seidauk fó ba benefisiáriu sira, tanba empreza konstrusaun nian seidauk entrega ba Governu.
Iha tinan 2011, Governu sei kontinua mantein programa protesaun sosiál ida ne’e.
Administradór sub-distritu Vera-Krús, José Filipe Smith, afirma katak “tulun hirak ne’ebé fó hosi Governu tenke mantein ho kondisaun di’ak atu nune’e, iha futuru, halo membru família benefisiáriu sira hotu bele hetan moris di’ak ”.
Hosi uma tolunulu resin haat (34) ne’ebé fó ba distritu Díli, ualu (8) entrega ba sub-distritu Vera- Krús, ualu (8) ba sub-distritu Metinaru no sanulu resin ualu (18) ba sub-distritu Ataúru. Totál valór konstrusaun nian hamutuk dolar rihun atus ida tolunulu resin neen (US$136.000), folin uma ida hetan, to’o dolar rihun haat (US$4.000).
