Governu Timor-Leste

Ministru Prezidénsia Konsellu Ministrus, Agio Pereira, akompaña hosi Diretór-Jerál  Servisu Nasionál Intelijénsia Estratéjiku, Longuinhos Monteiro, iha loron 02 fulan-setembru tinan 2025, hasoru malu ho delegasaun ida hosi Embaixada Austrália nian iha Timor-Leste atu analiza pasu sira tuirmai hodi hametin kooperasaun bilaterál kona-ba siberseguransa. Delegasaun Austrália nian inklui Konselleira ba Governasaun no Ekonomia, Fabia Shah, no Primeiru-Sekretáriu Martin Hirst no Monica Kovats. 

Sorumutu ne’e hala’o tuir diálogu ida-ne’ebé uluk hala’o ho Embaixadór Austrália ba Asuntu Sibernétiku no Teknolojia Krítika, Brendan Dowling, no Embaixadora Austrália nian iha Timor-Leste, Caitlin Wilson, iha ne’ebé parte rua destaka importánsia atu hametin reziliénsia dijitál Timor-Leste nian hasoru dezafiu sira ne’ebé mosu.

Durante sorumutu ne’e, ko’alia kona-ba área prioridade sira ba kolaborasaun ne’ebé identifika ona entre governu rua ne’e, inklui hala’o análize abranjente ida kona-ba ameasa no lakuna sira iha enkuadramentu regulatóriu siberseguransa nian, disponibiliza apoiu tékniku iha terrenu, fornese ekipamentu no programa kapasitasaun nian, nune’e mós hametin mekanizmu fahe informasaun no intelijénsia nian. Kria Grupu Traballu interministeriál ida iha Timor-Leste, iha koordenasaun ho autoridade australiana sira mós diskute hanesan instrumentu ida hodi hala’o kooperasaun iha área ida-ne’e.

Autoridades australiana reafirma sira-nia disponibilidade atu apoia Governu Timor-Leste, liuliu iha ámbitu Programa Kooperasaun Sibernétika Sudeste Aziátiku no Pasífiku nian, no hato’o nia disponibilidade hodi kolabora iha protesaun ligasaun kabu submarinu foun ne’ebé sei hametin konektividade nasionál. Kooperasaun ne'e prevee mós definisaun hosi roteiru konjuntu ida hodi proteje infraestrutura esensiál sira no mitigasaun ba riskus sibernétikus.

Akompaña iha Facebook