Komunidade Timoroan iha Austrália Selebra Meiu Sékulu Istória
Ministru Prezidénsia Konsellu Ministrus, Agio Pereira, partisipa iha jantár komemorativu tinan 50 prezensa komunidade timoroan nian iha Austrália, ne’ebé hala’o iha Sidney, iha loron 23 fulan-agostu tinan 2025, iha ne’ebé nia ko’alia lori Governu Timor-Leste nia naran. Eventu ne’e organiza husi Asosiasaun Xineza Timor Nova Gales Súl nian, sura mós ho prezensa husi Ministru Administrasaun Estatál, Tomas do Rosário Cabral, Prezidente Asosiasaun, William K. Leong, no membrus komunidade timoroan balu ne’ebé hela iha país ne’e. 
Iha nia intervensaun, Ministru Agio Pereira subliña kontributu hosi Asosiasaun Timoroan-Xineza, hodi afirma katak nia “haksolok tebes” bele hola parte iha “selebrasaun tinan 50 hosi asosiasaun distinta ida-ne’e, ne’ebé hala’o ona knaar ida ne’ebé importante tebes iha prezervasaun identidade no valorizasaun istória hosi komunidade timoroan iha Austrália”.
Governante ne’e mós hateten katak “tinan 2025 iha signifikadu espesiál ba Timor-Leste”, hodi fó hanoin katak, “iha loron 20 fulan-agostu, ita selebra tinan 50 kriasaun FALINTIL” no katak, “iha fulan hirak tuir mai, ita sei selebra mós tinan 50 Proklamasaun Unilaterál Independénsia, iha loron 28 fulan-novembru”. "No iha loron 07 fulan-dezembru, ita sei halo pauza hodi reflete kona-ba tinan lima-nulu ne'ebé liu ona dezde invazaun ho eskala boot husi Indonézia, kapítulu susar ida iha ita-nia istória ne'ebé husik marka sira ne’ebé kle’an hosi reziliénsia povu timoroan nian. Momentu sira-ne'e, ho abut metin iha ita-nia memória koletiva, kontinua sai hanesan fonte unidade ida ba ita-nia nasaun no ninia diaspora", nia hatutan tan. 
Dirije ba membrus Asosiasaun nian, Ministru elojia "dedikasaun ba kultura, solidariedade no espíritu komunitáriu" ne'ebé hametin ona "la'ós de'it lasu entre membrus asosiasaun ida-ne'e, maibé mós ligasaun ne’ebé dura entre Timor-Leste no ninia diaspora".
"Lori Governu Timor-Leste nia naran, ha'u espresa ami-nia rekoñesimentu kle'an ba ita-boot sira-nia kontribuisaun hodi promove valores unidade, respeitu, no amizade nian, no hato'o ha'u nia parabéns ba momentu importante tebes ida-ne'e", nia afirma. 
Selebrasaun ne’e inklui misa ida ne’ebé organiza husi Komunidade Katólika Timorense iha Igreja Nossa Senhora do Monte Carmelo iha Bonnyrigg, tuir mai hala’o jantár komemorasaun nian iha Crystal Palace Function Centre iha Canley Heights, no kontinua iha loron 24 fulan-agostu ho enkontru ida iha Sydney Portugal Community Club, iha Marrickville, ne’ebé halibur membrus balun husi komunidade timoroan ne’ebé hela iha Austrália. 
