Governu Timor-Leste

Iha loron 28 fulan-agostu, Timor-Leste selebra ninia Loron Nasionál iha Expo 2025 Osaka, Kansai, Japaun, iha serimónia ida-ne’ebé reafirma identidade nasionál, diversidade kulturál no potensiál dezenvolvimentu país nian iha komunidade internasionál nia oin. 

Eventu ne'e hala'o iha National Day Hall “Ray Garden” no halibur konvidadus 200 resin, inklui reprezentante diplomátiku, autoridade japonezas no parseiru internasionál sira. Delegasaun timoroan ne’e xefia hosi Prezidente Repúblika, José Ramos-Horta, konvidadu onra iha serimónia ne’e, ne’ebé akompaña hosi Ministru Estadu Japaun responsável ba Expo 2025, Yoshitaka Ito, Vise-Primeiru-Ministru no Ministru Koordenadór ba Asuntus Ekonómikus no Ministru Turizmu no Ambiente, Francisco Kalbuadi Lay, nune’e mós reprezentante Parlamentu Nasionál no membrus Governu balun.

Iha ninia intervensaun, Xefe Estadu destaka kompromisu Timor-Leste nian ba kooperasaun internasionál, hodi salienta país nia trajetória hanesan demokrasia joven ida ne’ebé dinámika no empeñada iha diálogu globál.

Programa ne’e inklui aprezentasaun dansa, múzika no arte tradisionál sira ne’ebé hatudu rikeza partimóniu kulturál timoroan nian. Iha tempu hanesan, Pavillaun Timor-Leste ne’ebé lokaliza iha área dedikada ba Estadus-Membrus ASEAN, fó oportunidade ba vizitante sira atu koñese artezanatu, gastronomia no destinu turístiku nasionál sira, hodi projeta país nia imajen ida hanesan espasu atrativu ba investimentu no interkámbiu kulturál iha rejiaun Ázia-Pasífiku.

Hafoin serimónia, Prezidente Repúblika, Vise-Primeiru-Ministru, reprezentantes parlamentares no membrus Governu vizita Pavillaun Timor-Leste no espasu nasionál sira seluk iha Expo ne’e, hodi promove lasu amizade no kooperasaun.

Tranzmite liuhusi kanál televizaun japonés NHK no mós iha formatu virtuál, Loron Nasionál Timor-Leste iha Expo 2025 Osaka reforsa projesaun internasionál país nian, konsolida amizade ho Japaun no ho parseiru rejionál no globál sira, no reafirma kompromisu Governu nian atu harii futuru ida ne’ebé sustentavel, inkluzivu no nakloke ba mundu.

Expo 2025 Osaka hahú husi loron 13 fulan-abríl to’o 13 fulan-outubru, ho lema “Projeta sosiedade futuru ba ita-nia moris ”