Primeiru-Ministru inaugura Semana Akampamentu Nasionál ba Joven sira ho Defisiénsia iha Aileu
Iha loron 25 fulan-agostu tinan 2025, Primeiru-Ministru Kay Rala Xanana Gusmão prezide serimónia abertura Semana Akampamentu Nasionál ba Joven sira ho Defisiénsia, ne’ebé hala’o iha Suku Seloi Kraik, iha Postu Administrativu Aileu, Munisípiu Aileu. Eventu ne’ebé promove hosi Asosiasaun Defisiénsia Timor-Leste (ADTL) no integra iha selebrasaun sira ba aniversáriu Konsulta Populár ba da-26, halibur jovens maizumenus na’in-150 hosi munisípiu Aileu, Ainaru, Kovalima, Manufahi no Dili. 
Iha ninia diskursu, Primeiru-Ministru destaka importánsia husi inisiativa ne’e, hodi afirma: "Ida-ne'e maka dala uluk ha'u partisipa iha akampamentu ida hanesan ne’e. Tanba ne'e, iha loron 30 fulan-agostu, ha'u sei fila fali mai Aileu hodi selebra aniversáriu Konsulta Populár nian hamutuk ho ita-boot sira. Agora ha'u husik ita-boot sira ho dezafiu atu promove diálogu, formasaun, edukasaun no reflesaun, tanba ida-ne'e mak inisiativa ida ne'ebé importante tebes. Joven barak ho defisiénsia hasoru barreira komunikasaun ka mobilidade, maibé sira-nia forsa loloos maka iha sira-nia intelijénsia no reziliénsia. Ha’u kontente tebetebes bele hamutuk ho imi iha fatin ida-ne’e.”
Ho tema "Formasaun, Edukasaun Sívika, Diálogu, Reflesaun, Fahe Esperiénsia, Animasaun, Konsulta Saúde" no "Selebrasaun Konsulta Populár", semana atividade sira inklui formasaun kona-ba defisiénsia no inkluzaun, edukasaun bázika ba abilidade sira moris nian, literasia dijitál, jornalizmu báziku, polítika protesaun labarik nian, prevensaun violénsia bazeia ba jéneru, introdusaun ba uzu intelijénsia artifisiál, no mós formasaun letra Braille. Programa ne’e inklui mós diálogu entre joven sira ho defisiénsia no reprezentante institusionál sira, inklui autoridade lokál no nasionál sira.
Serimónia abertura ne’e hetan partisipasaun husi Ministru Juventude, Desportu, Arte no Kultura, Nélio Isaac Sarmento, Sekretária Estadu Igualdade no Inkluzaun, Elvina Sousa Carvalho, Prezidente Autoridade Munisipál Aileu, reprezentantes husi Provedoria Direitus Umanus no Justisa, Departamentu Negósius Estranjeirus no Komérsiu Austrália nian (DFAT) no OXFAM, dirijentes administrasaun públika no reprezentante sosiedade sivíl sira.
