Vasina animál
Governu dezenvolve hela implementasaun vasina animál iha Timor-Leste – medida ida ne’ebé integra iha Programa Saúde Animál ne’ebé Diresaun Nasionál Pekuária no Veterinária implementa mak “dadaun ne’e ami hasoru difikuldade barak kona-ba hetan vasinasaun tanba prosesu aprovizionamentu, ne’ebé ba kazu espesífiku ida ne’e, karu, la’o neneik no komplikadu. Maibé ami prepara hela pedidu ba verba atu sosa vasina no ai-moruk”, Valentino varela esplika. Sekretáriu Estadu Pekuária konsidera katak “ medida ida ne’e sei kontribui ba kreximentu setór ne’e nian, ho sistema vasinasaun animál nian ida ne’e ita bele alkansa ho susesu iha Sentru Produsaun Animál nian sira ne’ebé namkari iha rai laran”.
Governu estabelese ona klínika veterinária nian no ekipa vizilánsia nian ne’ebé dezloka to’o kedan kriadór sira atu akompaña estadu saúde animál nian no halo tratamentu, karik presiza. Dadaun ne’e iha distritu neen mak hetan apoiu husi servisu hirak ne’e – Bobonaro, Covalima, Ainaro, Manufahi, Baucau no Manatuto – maibé Governu hakarak atu kria klínika veterinária barak liután iha fatin seluk iha rai ne’e.
