Gravasaun Epizódiu da-16 husi Programa “Página do Governo”, ho Ministru Petróleu no Rekursus Minerais, Francisco da Costa Monteiro
Ohin, loron 12 fulan-agostu tinan 2025, kontinua halo gravasaun ba programa “Página do Governo”. Iha edisaun foun ida-ne’e, halo ona gravasaun iha estúdiu Palásiu Governu, konvidadu maka Ministru Petróleu no Rekursus Minerais, Francisco da Costa Monteiro, ne’ebé ko’alia kona-ba papél estratéjiku ba rekursus naturais nian ba dezenvolvimentu país ne’e no oinsá Governu hakarak reforsa área ida-ne’e durante mandatu atuál. 
Iha entrevista, Ministru Francisco da Costa Monteiro, destaka prosesu negosiasaun ho parseiru internasionál sira kona-ba dezenvolvimentu projetu Tasi Mane, ne’ebé inklui projetu tolu hanesan; auto-estrada, Suai Supply Base no baze indústria petrolífera iha Natarbora. Inisiativa sira-ne’e, ne’ebé ligadus hotu ho projetu Greater Sunrise. 
Iha ezersísiu husi nia knaar nu’udar Ministru Petróleu no Rekursus Minerais, ministru Francisco Monteiro nia kompeténsia mak atu elabora no propoin polítika no projetu lei sira ba setór ida-ne’e, kria sistema administrasaun no jestaun setoriál, regula atividade sira hosi setor ne’e no mós garante Timor-Leste nia partisipasaun másima iha atividade setor petróleu no gas naturál nune’e mós rekursus minerais nian. 
Programa “Página do Governo” ne’e promove hosi Ministru Prezidénsia Konsellu Ministrus no Portavós Governu, Agio Pereira, ne’ebé parseria ho RTTL, no Nélia Chaves hanesan aprezentadora, Ika Moniz hanesan produtora ezekutiva no hetan apoiu tékniku hosi ekipa mídia Gabinete Primeiru-Ministru, Gabinete Portavós Governu no Gabinete Ministru Petróleu no Rekursus Minerais nian.
Programa ida-ne’e ho objetivu atu reforsa transparénsia no prosimidade entre Ezekutivu no populasaun, hodi permite katak ema hotu akompaña, ho forma asesivel no informada, asaun prinsipál no polítika públika sira ne’ebé la’o hela. REMATA
