Governu ho ADB realiza semináriu kona-ba konseitu Banku Nasionál Dezenvolvimentu Timor-Leste nian
Primeiru-Ministru, Kay Rala Xanana Gusmão, no membru Governu relevantes sira no ABD Timor-Leste, hala’o Semináriu kona-ba konseitu Banku Nasionál Dezenvolvimentu Timor-Leste (BNDTL), ne'e hala’o iha loron 1 fulan-agostu tinan 2025, iha Auditóriu Ministériu Finansas,Dili, ho objetivu atu promove reflesaun téknika no institusionál kona-ba kriasaun no operasionalizasaun Banku Nasionál Dezenvolvimentu Timor-Leste (BNDTL), instrumentu estratéjiku ne’ebé prevee ona iha Programa Governu Konstitusionál da-IX nian, ne’ebé temi espresamente iha ninia Lei Orgánika nu’udar inisiativa estruturante ba dezenvolvimentu ekonómiku sustentável no inkluzivu iha rai ida ne’e nian. 
Iha sesaun abertura ne’e hetan intervensaun husi Diretora ADB Timor-Leste, Stefania Dina no Primeiru-Ministru Kay Rala Xanana Gusmão. Diretora ADB sente honra tebes, ohin bele hamutuk ho Governu iha seminariu importante ida ne'e no destaka katak, nasaun ne’e hahú viajen transformativu ida ba sentru kreximentu inkluzivu no sustentável. Iha sentru transformasaun ida-ne'e nian maka estabelesimentu Banku Dezenvolvimentu Nasionál ida ne'ebé funsiona ho di'ak—katalizadór esensiál ida ba finansiamentu estratéjiku, projetu dezenvolvimentu bankáriu sira no loke investimentu vital sira iha infraestrutura no setór privadu.
Iha abertura semináriu nian, Primeiru-Ministru destaka importánsia vizaun Governu, kona-ba dezenvolvimentu ba país, presiza kria sistema finanseiru ida ne’ebé bele funsiona ba timor oan tomak, Governu Sei apoia investimentus transformadores — iha parte agrikultura, iha turizmu, iha indústria no iha abitasaun. Xefe Governu ne’e mos subliña importánsia banku ne’e sei aje (ka, atua), hodi promove interese nasionál. Nia misaun sei la limita de’it ba retornus finanseirus, maibé sentra iha valorizasaun kapasidade produtiva ita-nia povu tomak nian. 
Semináriu ne’e mos halo diskusaun husi peritu sira, kona-ba téknika, dezenvolvimentu strategia no vizaun ba Banku Nasionál Dezenvolvimentu Timor-Leste (BNDTL) ba futuru mai. 
Iha loron 30 fulan-jullu tinan 2025 Konsellu Ministrus, aprova ona projetu Dekretu-Lei ne’ebé kria Banku Nasionál Dezenvolvimentu Timor-Leste, SA (BNDTL), ne’ebé aprezenta hamutuk hosi Gabinetes Ministrus Planeamentu no Planeamentu Estratéjiku, Ministra Finansas no Vise-Primeiru Ministru no Ministru Koordenadór Asuntus Ekonómikus. 
BNDTL hanesan instituisaun finanseira ida ho kapitál públikus ne’ebé esklusivu, ho personalidade jurídika no autonomia administrativa, finanseira no patrimoniál, ne’ebé nia objetivu atu apoia investimentu produtivu no hasa’e kreximentu ekonómiku sustentavel país nian. Remata 
