Governu no Woodside Reforsa Aliñamentu kona-ba Prosesamentu Gás iha Timor-Leste iha Ámbitu Greater Sunrise
Ministru Petróleu no Rekursus Minerais, Francisco da Costa Monteiro, iha loron 28 fulan-jullu, simu delegasaun ida husi empreza Woodside Energy, ne’ebé lidera husi Julie Fallon, Vise-Prezidente Ezekutiva ba Dezenvolvimentu Tékniku no Enerjétiku, iha sorumutu ida kona-ba dezenvolvimentu kampus Greater Sunrise. 
Iha sorumutu ne’e, parte sira ko’alia liu kona-ba opsaun Timor-Leste Liquefied Natural Gas (TLNG - Gás Natural Liquefeito de Timor-Leste), ne’ebé estudu foin lalais ne’e identifika hanesan dalan ne’ebé viável liu, tantu husi pontu de vista komersial nune’e mós estratéjiku. Delegasaun rua ne’e reafirma sira-nia kompromisu atu avansa projetu ne’e, bazeia ba negosiasaun estruturadu ne’ebé orienta husi prinsípius fundamentais tolu: boa fé, kompromisu, no aliñamentu ba interese sira. 
Hafoin sorumutu, Ministériu Petróleu no Rekursus Minerais akompaña delegasaun Woodside Energy iha vizita loron rua ba Kosta Súl, liuliu iha parte Suai no Natarbora. Dezlokasaun ne’e sei permite atu halo observasaun ba infraestruturas ne’ebé iha ona no área sira ne’ebé dezignadu ba futuru instalasaun unidade likefasaun gás naturál (GNL), no mós kompleksu petrokímikus no refinarias. Ekipamentu sira-ne'e sei responsavel hodi simu no prosesa gás hosi kampu Greater Sunrise nian iha territóriu tomak. Programa vizita inklui vizita ba Aeroportu Suai, Baze Apoiu Lojístika Suai, zona ba bairru rezidénsia komunitária foun no pontu infraestrutura estratéjika sira seluk. 
Vise-Prezidente Ezekutiva Woodside Energy rekoñese importánsia husi kontaktu diretu iha terrenu no manifesta ninia apresiasaun ba oportunidade atu koñese di’ak liu kona-ba prioridade dezenvolvimentu nasionál no vizaun estratéjika Timor-Leste nian ba rejiaun Kosta Súl. 
Ministru Francisco Monteiro reafirma katak Governu Timor-Leste no Austrália, hamutuk ho parseiru Joint Venture Greater Sunrise (TIMOR GAP, E.P., Woodside Energy no Osaka Gas), oras ne’e daudaun halo hela negosiasaun kona-ba Kódigu Mineiru Petróleu, Kontratu Partilla Produsaun no Rejime Fiskál ne’ebé sei konstitui baze legál no kontratuál projetu nian.
Governante ne’e mós reafirma esforsu kontínuu Estadu timoroan nian ba dezenvolvimentu infraestruturas ne'ebé presiza, hosi Kovalima to'o Natarbora, ho objetivu atu konkretiza ninia vizaun ba tempu naruk hodi kria indústria petrolífera nasional ida ne'ebé sólidu no sustentável.
