Ministru Kultura Juventude no Desportu Portugál Hasoru-malu ho Primeiru Ministru Xanana Gusmão iha Ámbitu Jogu CPLP XII
Ministra Kultura, Juventude no Desportu Portugal nian, Margarida Balseiro Lopes, hasoru-malu ho Primeiru-Ministru, Kay Rala Xanana Gusmão, iha loron 25 fulan-jullu tinan 2025, hodi hato’o rekoñesimentu Governu Portugál nian ba ospitalidade ne’ebé Timor-Leste fó ba delegasaun sira ne’ebé partisipa iha Jogu Desportivu Komunidade País Lian Portugeza (CPLP) XII. Iha sorumutu ne’e, governante ne’e destaka “boazvinda kaloroza hosi povu Timor-Leste” no hodi Portugál nia naran hato’o, mensajen amizade ba Xefe Governu Timor-Leste nian. 
Vizita Ministru portugeza mai Timor-Leste hala’o iha kontestu Jogu CPLP no Konferénsia XVI Ministru Kultura, Juventude no Desportu Komunidade komunidade Luzofona nian, ne’ebé sei hala’o iha loron 27 oinmai, iha Díli. Partisipasaun iha eventu sira-ne’e ho objetivu atu hametin lasu kooperasaun iha espasu luzófonu no subliña kompromisu komún ba dezenvolvimentu juventude no kultura entre país-membru sira.
Hafoin hasoru malu ho Primeiru-Ministru, Margarida Balseiro Lopes hatete katak "Jogu CPLP reprezenta liu fali kompetisaun desportiva ida — Ida ne’e mak oportunidade ida hodi hametin lasu sira ne'ebé kesi ita. Ita partilla lian ida, maibé mós relasaun amizade no estima ne’ebé kle'an." 
Sorumutu ne’e partisipa mós husi Ministru Juventude, Desportu, Arte no Kultura, Nelyo Isaac Sarmento.
Durante ninia vizita iha país ne’e, Ministra asiste kompetisaun oioin, inklui futeból, karate no basketeból, no elojia dezempeñu husi delegasaun partisipante sira.
