Governu Timor-Leste

Ministru Prezidénsia Konsellu Ministrus, Agio Pereira, ohin, loron 24 fulan-jullu tinan 2025, iha Palásiu Governu, hasoru malu ho Embaixadór Uniaun Europeia iha Timor-Leste, Marc Fiedrich, iha enkontru despedida ida ne’ebé marka ninia misaun diplomátika ikus iha nasaun ne’e. 

Embaixadór Marc Fiedrich fó sai katak iha tempu badak nia sei hahú faze foun ida ba nia kareira diplomátika iha Myanmar. Nia konsidera katak, ida ne’e sei sai hanesan dezafiu importante ida no hatudu nia satisfasaun bele kontinua servisu iha rejiaun Sudeste Aziátiku.

Iha sorumutu ne’e, ko’alia kona-ba prosesu adezaun tomak Timor-Leste nian iha Asosiasaun Nasaun Sudeste Aziátiku (ASEAN), ne’ebé marka ona ba fulan-outubru tinan ne’e. Ministru no diplomata ne’e destaka kontribuisaun sira ne’ebé Timor-Leste bele fó ba bloku rejionál ne’e.

Iha sorumutu ne’e, Embaixadór refere ba rekomendasaun Relatóriu Finál Misaun Observasaun Eleitorál Uniaun Europeia nian no estudu konjuntu ho Banku Investimentu Europeu kona-ba poténsia setór agrofloresta iha Timor-Leste. Nia subliña importánsia hodi kontinua promove reforsu instituisaun demokrátika nian no adota medida sira ne'ebé kontribui ba transparénsia no konfiansa públiku iha prosesu eleitorál, no mós investe iha setór produtivu sira ne'ebé iha kapasidade hodi hamosu empregu no apoia diversifikasaun ekonomia nasionál, hanesan setór floresta. 

Ministru Agio Pereira agradese ba apoiu kontinua husi Uniaun Europeia nian no destaka ninia kontribuisaun sira ba diversifikasaun ekonómika no promosaun empregu iha Timor-Leste. Nia dezeja susesu ba Embaixadór iha ninia misaun foun no haktuir hikas kompromisu Governu nian atu mantein no aprofunda kooperasaun ho Uniaun Europeia.