EDTL Selebra Aniversáriu ba da-5 Ho Asina Kontratu Projetu Enerjia Solár no Lansamentu Plataforma Pagamentu Online

Eletrisidade Timor-Leste, Empreza Públika (EDTL, EP), selebra ninia aniversáriu ba dala 5 iha loron 22 fulan-Jullu tinan 2025, iha Dili, ho serimónia ida ne’ebé marka ho asinatura Kontratu Akizisaun Enerjia (PPA) ba konstrusaun sentrál fotovoltaika solar ida iha Laleia, munisípiu Manatutu, no ho lansamentu plataforma online foun ba tranzasaun enerjia, ne’ebé dezenvolve iha parseria ho ETO, BNCTL, Telkomcel, no Telemor.
Serimónia ne’e h ala’o iha salaun OKA, hetan partisipasaun husi Vise-Primeiru-Ministru no Ministru Koordenadór Asuntu Sosiál, Mariano Assanami Sabino, ne’ebé agradese ba funsionáriu EDTL tomak ba sira-nia dedikasaun no kompromisu loron-loron hodi garante katak eletrisidade to’o iha Timor-oan ida-idak nia uma ho seguru no kontinua. Lori Primeiru-Ministru Kay Rala Xanana Gusmão nia naran, nia felisita traballadores ba sira nia "esforsu loron-loron, ne'ebé, maski iha difikuldade no risku, kontinua ho pasiénsia no dedikasaun, ho apoiu hosi sira nia família, hodi serbí povu timoroan ho di'ak". Nia mós subliña katak Timor-Leste iha "fonte enerjia barak, hanesan anin, bee, no loro-matan, ne'ebé tenki uza ho sustentável hodi prezerva ambiente no garante dezenvolvimentu ba jerasaun sira iha futuru."
Ministru Obras Públikas, Samuel Marçal, hatete katak projetu enerjia solar fotovoltaika foun ne’e "sei lori benefísiu signifikativu ba Timor-Leste, kontribui ba dezenvolvimentu sustentável no protesaun ambientál", no garante katak sei fó prioridade ba envolvimentu rekursus umanus timoroan sira iha ninia ezekusaun.
Prezidente Komité Ezekutivu EDTL, Paulo da Silva, afirma katak aniversáriu ne’e reprezenta “momentu orgullu koletivu ida, rezultadu husi esforsu hamutuk, serbisu makas, dedikasaun, no kriatividade”.
Nia destaka, entre avansu prinsipál sira, modernizasaun sub-estasaun sira no hadi'a rede distribuisaun iha kapitál no munisípiu sira, aumentu taxa eletrifikasaun nasionál – ne'ebé to'o ona iha suku nasionál sira hotu,no hela aldeia 136 ne'ebé sei iha eletrisidade instaladu to'o tinan 2026 nia rohan -, instalasaun kontadór liu 1500, no prépagu kreximentu progresivu hosi reseita anuál sira, ne'ebé maka sai hosi dolar millaun 34 iha 2021 ba dolar millaun 58 iha 2024, ho espetativa sira atu atinji dolar millaun 65 iha tinan 2025 nia rohan. Paulo da Silva destaka mós konluzaun hosi estudu pré-viabilidade ba projetu enerjia anin nian no estudu viabilidade ba jeradór gazoel sira ne'ebé konverte ba gás.
Durante serimónia ne’e, Vise-Primeiru-Ministru, Ministra Obras Públikas no Ministra Finansas, Santina José Rodrigues F. Viegas Cardoso, entrega sertifikadu rekoñesimentu ba departamentu sira EDTL nian, hodi fó onra ba ninia funsionáriu sira-nia kontribuisaun ba fortalesimentu setór eletrisidade nasionál.