MTCI monta Postu Turizmu on-line iha Aeroportu Comoro
Ministériu Turizmu, Komérsiu no Indústria (MTCI), instala ona postu turizmu (multimedia on-line) iha Aeroportu Nicolau Lobato, Díli, hodi ajuda ema turista estranjeiru sira ne’ebé hakarak halo viajen mai Timor-Leste hodi haree área turizmu iha pais ida-ne’e.
Inaugurasaun ba postu ne’e hala’o hosi Ministru Turizmu, Komérsiu no Indústria, Gil Alves, akonpaña hosi Diretora-Jerál MTCI, Georgina Manuela Corte-Real.
Postu turizmu ne’e iha informasaun kona-ba área turizmu kuaze iha Timór-Leste laran tomak. Turista sira sei fasil liu hatene fatin turizmu liu hosi postu ne’e bainhira to’o iha aeroportu Díli. Postu turizmu ne’e uja lian Portugés no Inglés.
Hafoin inaugura tiha Ministru, Gil Alves promete sei aranja tan ekipamentu hanesan atu monta iha fatin hirak ne’ebé sei identifika turista sira barak liu bele iha asesu ba. “Turista sira durante ne’e difisil hetan informasaun kona-ba turizmu Timor-Leste, maibé agora ho ekipamentu sira ne’e fasil liu atu hetan informasaun. Katak, turista sira sei vizita fatin turizmu hotu no ita nia komunidade sira sei hetan rendimentu balun inklui Governu,” tenik Ministru Turizmu, Komérsiu no Indústria.
Diretór Turizmu MTCI, José Dias Quintas, hatete fatin turizmu iha Timor-Leste governu hahú ona halo mapa no identifika duni fatin turizmu barak tebes iha territóriu ida-ne’e. Nune’e Governu iha kompromisu atu dezenvolve di’ak liután. “Iha tinan 2011 mai ami prepara orsamentu di’ak atu nune’e dezenvolve área turizmu, liu-liu hasa’e kapasidade rekursu umanu, fó apoiu ba área turizmu komunitáriu no seluk tan,” dehan José Dias Quintas.
