Governu Reforsa Ligasaun Saúde no Edukasaun liuhusi Loke Sala Saúde no Bein estar Foun Haat iha Baukau
Governu, liuhosi Ministériu Edukasaun, iha kooperasaun ho Ministériu Saúde no ho apoiu hosi Organizasaun Mundiál Saúde (OMS) no Ajénsia Kooperasaun Internasionál Korea (KOICA), ofisialmente inaugura Sala Saúde no Bein-estar foun haat iha munisípiu Baukau, iha loron 21 fulan-jullu tinan 2025, iha serimónia ida ne’ebé hala’o iha Eskola Bázika Sentrál (EBC) Binagari Vemasi. Sala foun sira ne’e, instala iha Eskola Bázika Binagari Vemasi, Soba Laga, Osú-Huna Baguia, no Vila-Nova Baukau-Vila Sentrál, halo parte iha programa nasionál Saúde Eskolár, no ho objetivu atu hadi’a estudante sira-nia asesu ba kuidadu saúde báziku no promove ábitu moris saudavel. 
Ho inagurasaun ne’e, Timor-Leste oras ne’e iha totál Sala Saúde no Bein-estar hamutuk 11 ne’ebé funsiona iha eskola sira iha Timor laran tomak, ne’ebé reforsa kompromisu governu atu liga aprendizajen ho bein-estar estudante nian. Planu ne'e prevee katak, tuir faze sei loke tan eskola barak liután iha territóriu nasionál. 
Sala sira ne’e ekipadu ho dasin tetu todan no metru aas nian, ai-moruk sira, no materiál edukasaun saúde nian. Sira mós iha enfermeiru tempu-tomak ida ne'ebé responsavel hodi fornese asisténsia bázika, hala'o triajen saúde matan, tilun, kulit, no nehan, no deteksaun lalais ba problema saúde sira. Planeia mós kriasaun ba rejistu saúde estudante nian, ne'ebé sei integra iha baze-dadus sira Ministériu Saúde no Ministériu Edukasaun nian, hodi permite intervensaun saúde eskolár nian ne'ebé efikás liu. 
Iha ninia diskursu, Ministra Edukasaun, Dulce de Jesus Soares, subliña katak "labarik ida nia susesu hahú ho saúde di'ak" no destaka responsabilidade hamutuk hodi mantein atu espasu sira ne'e nafatin ativu no iha impaktu, hamutuk ho komunidade eskolár sira. 
Reprezentante OMS iha Timor-Leste, Arvind Mathur, hateten katak "saúde no edukasaun labele haree hanesan nesesidades ne’ebé ketak, maibé hanesan direitu sira ne'ebé iha ligasaun ba malu ne'ebé labarik hotu-hotu merese hetan." Diretór KOICA iha Timor-Leste, Youn Hwa Kang, hato’o esperansa katak sala sira ne’e sei kontribui ba dezenvolvimentu fíziku no mentál estudantes Timor-Leste nian. 
Serimónia ofisiál ne’e marka mós prezensa husi Vise-Ministru Fortalesimentu Institusionál Saúde, José dos Reis Magno, Prezidente Autoridade Munisipál Baukau, Veneranda Lemos Martins, dirijente servisu edukasaun Munisípiu Baukau, profesór no estudante sira. 
