Governu Timor-Leste

Sekretária Estadu ba Igualdade, Elvina Sousa Carvalho, partisipa iha Forum Polítiku Altu Nivel kona-ba Dezenvolvimentu Sustentavel (HLPF 2025), ne’ebé hala’o iha Sede Nasoins Unidas, iha Novaiorke. Forum ida-ne’e, ne’ebé organiza ho apoiu hosi Konsellu Ekonómiku no Sosiál (ECOSOC), hanesan plataforma prinsipál ONU hodi halo monitorizasaun no revizaun ba implementasaun Ajenda 2030 no Objetivu Dezenvolvimentu Sustentável (ODS) 17. Edisaun tinan ida-ne’e ho tema “Promove solusaun sustentável, inkluzivu, bazeia ba siénsia no evidénsia ba Ajenda 2030 nian hodi garante laiha ema ida mak husik hela iha kotuk”. 

Durante HLPF ne’e, Governu Timor-Leste, liuhosi Sekretaria Estadu Igualdade no ho apoiu hosi Feto ONU, iha loron 14 fulan-jullu organiza eventu paralelu ne’e "Dalan ida ba ODS 5: Modelu Timor-Leste ba Prevensaun no Resposta Koordenada ba Violénsia Bazeia ba Jéneru", iha Sede ONU nian. Eventu ne’e ho objetivu atu fahe esperiénsia nasionál kona-ba prevensaun no resposta ba violénsia bazeia ba jéneru, promove interkámbiu prátika di’ak no hametin parserias hodi aselera igualdade jéneru no empoderamentu feto no labarik-feto sira. 

Iha sesaun abertura, Reprezentante Permanente Timor-Leste iha Nasoins Unidas, Embaixadór Dionísio Babo Soares, subliña katak "Timor-Leste nia kompromisu ba igualdade jéneru iha ligasaun ne’ebé esensiál ba harii sosiedade ida ne'ebé justa no pasífika liu". Ida-ne'e tuir fali ho diskursu ida hosi Sekretária Estadu Igualdade, ne'ebé subliña katak "resposta koordenada ba violénsia bazeia ba jéneru sai hanesan marku ida iha ami-nia progresu. Ami nafatin iha kompromisu atu serbisu hamutuk ho parseiru hotu-hotu hodi garante katak laiha feto ka labarik-feto ida maka husik hela iha kotuk".

Prezidente Repúblika Demokrátika Timor-Leste, José Ramos-Horta, haruka mensajen vídeo ida iha ne’ebé husu atu aumenta apoiu ba feto sira, liuliu sira ne’ebé hela iha áreas rurais. "Igualdade jéneru no inkluzaun hanesan prioridade sira ne'ebé maka ha'u tau nafatin atensaun. Esensiál maka Governu kontinua kapasita feto sira iha setór ekonómiku no kria kondisoins ba sira-nia partisipasaun iha foti desizaun públika no privada, no mós ho forma desiziva kombate forma violénsia hotu-hotu bazeia ba jéneru", nia afirma. 

Painél ba debate ne’e konta ho partisipasaun husi Elvina Sousa Carvalho, Vise-Ministru Fortalesimentu Institusionál Saúde, José dos Reis Magno, Vise-Reprezentante Permanente Austrália nian ba ONU, Beth Delaney, Xefe Sesaun Dezenvolvimentu Sustentavel no Parserias Internasionais Delegasaun Uniaun Europeia nian ba ONU, Renaud Savignat, no Koordenadora Globál Inisiativa Spotlight, Erin Kenny. Eventu ne’e modera hosi Santina Soares, Konselleira Polítika ba Igualdade Jéneru no Asuntus ASEAN iha Sekretaria Estadu Igualdade, no taka ho mensajen vídeo ida husi Xefe Eskritóriu Feto ONU nian iha Timor-Leste, Amy Nishtha Satyam. 

Forum Polítiku Altu Nivel 2025 ne’e hala’o to’o loron 23 fulan-jullu no halo análize kle’an ida kona-ba Objetivu Dezenvolvimentu Sustentável lima, inklui ODS 5 – Igualdade Jéneru, hodi hametin kompromisu globál atu “la husik ema ida iha kotuk” hodi implementa Ajenda 2030 nian.