Governu Timor-Leste

Primeiru-Ministru, Kay Rala Xanana Gusmão, hala’o vizita ida ba munisípiu Kovalima iha loron 9 to’o loron 11 fulan-jullu, iha ne’ebé nia lidera atividade lubuk ida ho objetivu atu hametin dezenvolvimentu lokál no hadi’a populasaun sira-nia kualidade moris. Xefe Governu akompaña husi membrus Governu, autoridades munisipais, no reprezentante sosiedade sivíl sira, partisipa iha inaugurasaun sistema fornesimentu bee-moos iha Fohoreen, lansa projetu reabilitasaun estrada iha Postu Administrativu Maukatar, no hasoru malu ho lideransa munisipál hodi avalia progresu programa dezenvolvimentu nian.

Iha loron 10 fulan-jullu, Primeiru-Ministru no Ministru Obras Públikas, Samuel Marçal, akompaña hosi Sekretáriu Estadu Dezenvolvimentu Lokál, Mateus dos Santos Tallo, Sekretáriu Estadu Asuntus Toponímia no Organizasaun Urbana, Germano Santa Brites Dias, no Prezidente Konsellu Administrasaun Bee Timor-Leste, E.P. (BTL) Gustavo da Cruz, inaugura Projetu Melloria Sistema Fornesimentu Bee-moos iha Postu Administrativu Fohoreen. Projetu ne’e permite sei fornese bee ne’ebé kanaliza ba agregadu familiár liu 200, ne’ebé fó benefísiu maizumenus ba ema 1.260, no inklui instalasaun ba rezervatóriu rua ho kapasidade boot, kuaze 2,3 km husi kanalizasaun no kontadór 210. Sistema foun ne’e mós liga ba edifísiu públiku balu, hanesan sentru saúde, eskola, postu PNTL, edifísiu administrasaun postu, sede suku no igreja. “Ohin ita inaugura sistema ida-ne’e nu’udar parte ida husi ita-nia resposta konkreta ba ezijénsia komunidade nian”, Primeiru-Ministru hateten durante serimónia ne’e. Tuir planu Ministériu Obras Públikas nian, liuhusi BTL, prevee ona sei halo inaugurasaun hanesan iha Maubisi, Fatuberliu, Osú no Lakluta.

Iha loron tuir-mai, loron 11 fulan-jullu, Primeiru-Ministru dezloka ba Postu Administrativu Maukatar, iha ne’ebé nia prezide serimónia lansamentu fatuk dahuluk ba projetu reabilitasaun estrada entre suku Ogues no Leogore. Projetu ne’e fahe ba pakote rua no kobre maizumenus kilómetru 17 no reprezenta investimentu totál ida hamutuk dolar amerikanu millaun 5,5. Serbisu sira ho prazu ezekusaun entre fulan 12 to'o 18, sei hala'o hosi konsórsiu emprezariál rua ho supervizaun hosi Ministériu Obras Públikas.

Durante serimónia ne’e, Prezidente Autoridade Munisipál Kovalima, Miguel Armada Cardoso, hato’o satisfasaun komunidade sira-nian ho inísiu ba obras, hodi salienta importánsia infraestruturas rodoviárias atu fasilita lori sai produtu lokál sira no husu komunidade nia kooperasaun atu garante serbisu ne’e la’o ho di’ak. "Ami hein durante tempu naruk ona ba estrada ida-ne'e. Agora maka Governu IX finalmente lansa projetu ne'e, ami hato'o de'it ami nia agradesimentu no apoiu", nia hatete.

Iha sorin seluk, Primeiru-Ministru destaka, katak investimentu iha infraestruturas bázikas ne’e prevee ona iha Planu Estratéjiku Dezenvolvimentu 2011–2030 no nu’udar responsabilidade Estadu nian ba sira ne’ebé luta ba independénsia nasionál. "Ami halo ida-ne’e la’ós atu hetan rekoñesimentu, maibé atu fó onra ba saudozu sira-nia sakrifísiu no serbí povu ne’ebé sobrevive hodi harii país ida-ne’e", nia subliña.

Vizita ne’e hahú iha loron 9 fulan-jullu ho sorumutu ida entre Primeiru-Ministru ho Autoridade Munisipál Kovalima, ne’ebé hala’o iha rezidénsia ofisiál autoridade ne’e nian. Sorumutu ne'e permite atu avalia progresu hosi programa dezenvolvimentu munisipál sira no identifika dezafiu prinsipál sira ne'ebé sei ultrapasa. Xefe Governu rona ho atensaun aprezentasaun sira husi Prezidente Miguel Armada Cardoso ho nia ekipa, ne’ebé destaka importánsia atu hametin infraestruturas bázikas no kontinua esforsu desentralizasaun nian.