Governu Timor-Leste

Primeiru-Ministru Timor-Leste, Kay Rala Xanana Gusmão, akompaña hosi delegasaun ministeriál ida, sei halo viajen ba Singapura tanba konvite hosi Primeiru-Ministru Repúblika Singapura, Lawrence Wong, hodi halo vizita ofisiál ida hosi loron 14 to'o 15 fulan-jullu tinan 2025.

Vizita ofisiál ne’e sei selebra tinan 23 relasoins diplomátikas entre nasaun rua ne’e. Sei sai mós Primeiru-Ministru Gusmão nia vizita ofisiál dahuluk ba Estadu-membru ASEAN ida dezde akordu unánime ne’ebé hetan iha Simeira Xefes Estadu no Governu ASEAN nian ba dala 46, iha Kuala Lumpur, iha fulan-maiu kona-ba Timor-Leste nia adezaun ba grupu rejionál ida-ne’e, ne’ebé marka ona ba fulan-outubru 2025. Vizita ofisiál ne’e sei serve mós atu reforsa relasoins bilaterais no hametin kooperasaun entre Singapura no Timor-Leste.

Vizita ofisiál sei hahú iha segunda-feira, loron 14 fulan-jullu, ho serimónia benvindu iha Ministériu Negósius Estranjeirus, tuir fali ho enkontru bilaterál ho Primeiru-Ministru Singapura nian, Lawrence Wong. Tuirmai, Primeiru-Ministru no delegasaun sei partisipa iha almosu ofisiál ida ne'ebé oferese hosi Primeiru-Ministru Wong, ne'ebé hanesan mós Ministru Finansas Singapura nian.

Tuirmai, Primeiru-Ministru Gusmão sei halo vizita kortezia ida ba Prezidente Singapura nian, Sua Exelénsia Tharman Shanmugaratnam, iha Presidential Istana Villa (Palásiu).

Delegasaun ne’e mós sei vizita Oseanáriu Singapura nian iha Resorts World Sentosa hodi aprende liután kona-ba estratéjias Singapura nian iha área edukasaun tasi, peskiza, no dezenvolvimentu institusionál— koñesimentu sira ne'ebé sei apoia Timor-Leste nia intensaun atu estabelese Sentru Edukasaun no Peskiza Mariña nian ida iha Illa Atauru.

Iha tersa-feira, loron 15 fulan-jullu, loron daruak vizita ofisiál, Primeiru-Ministru ho nia delegasaun sei vizita Cora Environment nia fábrika ne’ebé transforma lixu sai enerjia, iha Jurong Island. Ho Timor-Leste ne’ebé dezenvolve, nia sei hasoru dezafiu sira ne’ebé relasiona ho lixu ne’ebé aumenta no oinsá bele jere ho forma sustentável. Vizita ida-ne'e sei fornese hanoin sira ne'ebé iha valór kona-ba oinsá Singapura hetan solusaun inovativu sira hodi trata nia lixu no transforma lixu ba solusaun enerjétika sira.

Tuirmai, delegasaun ofisiál sei vizita Garden by the Bay, iha ne’ebé Primeiru-Ministru Gusmão sei kuda ai-kameli-hun ida. Timor-Leste sei oferese ai-kameli oan 60 ba Governu Singapura hodi fó onra ba ninia aniversáriu Independénsia ba dala 60.

Iha loro-kraik, Primeiru-Ministru Gusmão sei hato’o Palestra Públika Distinta ida iha S. Rajaratnam School of International Studies (RSIS), ho títulu “Timor-Leste and ASEAN: A New Chapter in the Region’s Story.”  Ida-ne'e maka nia fila fali ba instituisaun prestijiada ida-ne'e, iha ne'ebé nia ko'alia ikus liu iha tinan 2013.

Primeiru-Ministru sei vizita mós Konsellu Abitasaun no Dezenvolvimentu Singapura nian hodi hetan koñesimentu kona-ba polítika abitasaun públika nasaun, modelu finansiamentu abitasaun públika no planeamentu urbanu sosiál nian. Lisaun sira ne’ebé aprende hosi Singapura nia modelu abitasaun públika ne’ebé susesu sei kontribui ba Timor-Leste nia esforsu ne’ebé la’o hela atu dezenvolve uma ho kualidade no presu baratu ba povu timoroan.

Primeiru-Ministru sei akompaña hosi membru importante sira hosi ninia Gabinete, inklui Vise-Primeiru-Ministru, ne’ebé hanesan mós Ministru Koordenadór ba Asuntus Ekonómikus no Ministru Turizmu no Ambiente, Francisco Kalbuadi Lay; Ministru Negósius Estranjeirus no Kooperasaun, Bendito dos Santos Freitas; Vise-Ministra ba Asuntus ASEAN, Milena Maria da Costa Rangel; no Sekretáriu Estadu Komunikasaun Sosiál, Expedito Dias Ximenes.

Delegasaun ne'e tuir planu sei sai hosi Singapura iha kuarta-feira, loron 16 fulan-jullu.