ASEAN Reafirma Kompromisu ba Timor-Leste nia Adezaun Plena
Iha Reuniaun Ministrus Negósius Estranjeirus (AMM) ba dala 58, ne’ebé hala’o iha loron 9 fulan-jullu tinan 2025, iha Kuala Lumpur, kapitál Malázia nian, Estadus-Membrus ASEAN reafirma “kompromisu ASEAN nian ba komunidade rejionál ida ne’ebé inkluziva no sustentável liuhosi apoia adezaun plena Timor-Leste nian ba ASEAN”. 
Timor-Leste reprezenta iha sorumutu ne’e, Ministru Negósius Estranjeirus no Kooperasaun, Bendito dos Santos Freitas, no Vise-Ministra ba Asuntus ASEAN, Milena Maria da Costa Rangel. 
Iha komunikadu konjuntu ne’ebé fó sai hafoin reuniaun ne’e, Ministru sira subliña “kompromisu atu implementa desizaun Lider ASEAN sira-nian iha Simeira ASEAN ba da-46, ne’ebé hateten: ‘atu admite Timor-Leste nu’udar membru ASEAN ba da-11 iha Simeira ASEAN ba dala 47 iha fulan-outubru tinan 2025, no fó instrusaun ba ami-nia Ministru no Ofisiál Importante sira atu foti medida prosedimentál nesesária sira ba Timor-Leste nia admisaun iha Simeira ASEAN ba dala 47, no mós atu aselera negosiasaun kona-ba akordu ekonómiku prinsipál sira.'” 
ASEAN rekoñese no simu ho ksolok Timor-Leste nia kompromisu “atu adere, implementa no respeita tratadu, konvensaun, akordu, no instrumentu hotu-hotu ASEAN nian iha pilár tolu Komunidade ASEAN nia okos, tuir Kritériu II husi Roteiru ne’ebé bazeia ba kritérius objetivus ba Timor-Leste nia Adezaun Plena iha ASEAN, ne’ebé adota husi Lider sira iha Simeira ASEAN nian ba da-42 iha fulan-maiu tinan 2023, hanesan baze ba Timor-Leste nia adezaun.”
Ministru sira mós reafirma “kompromisu atu apoia Timor-Leste hodi aselera nia adezaun inisiál ba akordu ekonómiku prinsipál sira ASEAN nian, hodi nune'e bele fasilita nia integrasaun plena iha organizasaun ne’e.”
Iha kontestu ida-ne’e, ministru sira hato’o konfiansa ba Timor-Leste nia perkursu adezaun:
“Ami hein katak Timor-Leste kumpre ninia knaar no obrigasaun sira nu’udar Estadu-Membru iha futuru no mantein ninia kompromisu ba prinsípiu fundamentál sira ASEAN nian.”
Timor-Leste nia partisipasaun ativa nu’udar Observadór mós, hetan rekoñesimentu:
“Ami hahí Timor-Leste nia partisipasaun ativa nu’udar Observadór iha enkontru sira ASEAN nian, nune’e mós ninia kompromisu ba adezaun plena no kumprimentu kritériu hotu-hotu ne’ebé estabelese ona iha Roteiru ba Adezaun Plena Timor-Leste nian iha ASEAN.”
Ministru sira enkoraja nasaun ne’e atu kontinua esforsu rai-laran, hodi subliña:
“Ami enkoraja Timor-Leste atu kontinua aselera fortalesimentu ba ninia kapasidade institusionál sira no aprofunda ninia envolvimentu ho Órgaun Setoriál sira hotu ASEAN nian, hodi bele kumpre obrigasaun sira ne'ebé inerente ba adezaun.”
“Ami mós enkoraja Timor-Leste nia esforsu sira ne'ebé kontinua atu aliña nia polítika nasionál, prosesu, no estrutura sira ho akordu no enkuadramentu sira ASEAN nian, hodi promove prosesu integrasaun ida ne'ebé la'o ho di'ak no efetivu.”
“Ami hein kontribuisaun signifikativa ida hosi Timor-Leste ba implementasaun Vizaun ASEAN 2045: Ita-nia Futuru Hamutuk, hodi rekoñese katak Timor-Leste nia esforsu sira ba integrasaun ASEAN nian sei kontribui ba hametin organizasaun nia reziliénsia, inkluzaun no sustentabilidade.”
Operasionalizasaun Unidade Timor-Leste nian iha Sekretariadu ASEAN nia laran mós destaka hanesan pasu fundamentál ida:
“Ami simu ho ksolok ba estabelesimentu Unidade Timor-Leste nian iha ámbitu Sekretariadu ASEAN, ne'ebé sei sai hanesan mekanizmu esensiál ida atu fasilita Timor-Leste nia integrasaun iha estrutura no prosesu sira ASEAN nian, nune'e mós atu apoia no monitoriza Timor-Leste nia implementasaun kompletu ba Roteiru ne’e.”
ASEAN repete importánsia solidariedade entre Estadus-Membrus hodi fó apoiu ba prosesu adezaun Timor-Leste nian:
“Ami enkoraja nafatin envolvimentu no apoiu hosi Estadu-Membru sira ASEAN nian hodi fasilita Timor-Leste nia tranzisaun ba adezaun, no mós Timor-Leste nia esforsu kontínuu sira atu kumpre Roteiru hafoin nia adezaun.”
Kona-ba seguransa rejionál, organizasaun ne’e hato’o ninia apoiu ba Timor-Leste nia adezaun ba Tratadu Zona Livre Armas Nukleares Sudeste Aziátiku nian (SEANWFZ):
“Ami hein tebetebes entrada iha vigór hosi Aditamentu ba Tratadu Zona Livre Armas Nukleares Sudeste Aziátiku nian (SEANWFZ) no Timor-Leste nia adezaun tuirmai ba Tratadu ida-ne'e iha Simeira ASEAN ba dala 47, ne'ebé sei reforsa liután kompromisu rejiaun nian ba dezarmamentu nukleár no naun-proliferasaun.”
Atu garante prosesu nia kompletasaun iha prazu sira ne'ebé estabelese ona, halo xamada asaun ida:
“Ami subliña nesesidade atu aselera ninia prosedimentu legál internu sira, hodi nune'e bele fasilita adezaun Timor-Leste nian tuir tempu.”
Governu Timor-Leste simu ho ksolok ba deklarasaun Estadus-Membrus ASEAN no reafirma nia kompromisu metin ba organizasaun nia prinsípiu no valór sira, kontinua ho determinasaun atu kumpre rekizitu hotu-hotu ne’ebé define ona iha roteiru ba adezaun plena.
