Governu Timor-Leste

Konferénsia Internasionál Sidades Amigas entre Timor-Leste no Austrália hala’o daudaun iha Salaun Nobre Ministériu Negósius Estranjeirus no Kooperasaun nian, iha Dili, iha loron 10 no 11 fulan-jullu, ne’ebé halibur autoridade munisípiu sira, reprezentantes husi postu administrativu sira, membru sosiedade sivíl sira, no grupu amizade sira husi nasaun rua. Serimónia abertura ne’e konta ho prezensa Prezidente Repúblika, José Ramos-Horta, transmisaun mensajen vídeo ida husi Primeiru-Ministru, Kay Rala Xanana Gusmão, no diskursu husi Ministru Administrasaun Estatál, Tomás do Rosário Cabral, no Embaixadora Austrália, Caitlin Wilson. 

Konferénsia ne’e hala’o husi Ministériu Administrasaun Estatál no Rede Grupu Amizade Timor-Leste–Austrália, konferénsia ne’e nia objetivu prinsipál sira mak atu hametin lasu entre komunidade timoroan no australiana, haburas parseria foun iha nivel lokál, no kontribui ba hametin relasoins entre governu nasaun rua ne’e nian. 

Iha nia intervensaun, Primeiru-Ministru Kay Rala Xanana Gusmão destaka valór hosi relasoins amizade ne’ebé estabelese iha tinan 25 liubá, maski molok restaurasaun independénsia: "Ha’u hanoin hikas oinsá, iha tinan 2000, Grupu Amizade tolu maka hahú hosi konsellu lokál sira iha Vitória – Friends of Baucau, Friends of Aileu, no Friends of Suai/Covalima. Ohin loron iha Grupu Amizade 32 ne’ebé namkari iha Austrália tomak."  Xefe Governu salienta mós impaktu pozitivu hosi inisiativa sira ne’e, hodi sita asaun konkretu sira hanesan konstrusaun eskola, distribuisaun bee-moos, bolsa estudu no apoiu tékniku iha setór saúde. "Bainhira dalaruma mosu tensaun sira iha relasaun sira ho Governu australianu, nunka iha dúvida ruma katak povu australianu apoia ami iha tempu ne’ebá. Obrigadu ba ita-boot sira-nia tempu, ita-boot sira-nia kompromisu, no ita-boot sira-nia kuidadu. Parabéns ba tinan 25 amizade nian no realizasaun estraordináriu sira", nia hatete. 

Loron daruak konferénsia nian hahú ho fahe testemuñu pesoál hosi Ministru Prezidénsia Konsellu Ministrus, Agio Pereira, kona-ba relasaun kleur entre Timor-Leste ho Austrália, iha ne’ebé nia hanoin hikas besik dékada rua ne’ebé nia hela iha nasaun ne’ebá. "onra no ksolok tebes mak ha’u fahe ho ita-boot sira testemuñu pesoál ida-ne’e kona-ba amizade entre Timor-Leste no Austrália — amizade ida ne’ebé bazeia ba jeografia, istória no solidariedade entre ita-nia povu sira", nia deklara. 

Nia hanoin hikas katak lasu entre nasaun rua ne'e hahú kedas iha Funu Mundiál Daruak, bainhira "soldadu australianu sira hetan apoiu, protesaun no akompañamentu hosi povu timoroan", hodi subliña katak istória komún ne'e marka "inísiu relasaun espesiál ida nian — relasaun ida ne'ebé la moris hosi interese estratéjiku sira, maibé hosi jestu korajen, solidariedade no umanidade nian hosi parte rua".

Ministru destaka mós tinan 50 prezensa komunidade timoroan nian iha Austrália, ho “istória reziliénsia, integrasaun no kontribuisaun ativa ba sosiedade australiana, hodi mantein nafatin ligasaun ho ita-nia pátria", no elojia mobilizasaun hosi sosiedade sivíl australiana, ne'ebé "hamutuk ba kauza ami-nia libertasaun ho laran-luak, aten-barani no konviksaun". 

Nia mós ko’alia kona-ba misaun INTERFET nian, ne’ebé lidera hosi Austrália iha tinan 1999, hanesan “demonstrasaun maka'as ida hosi solidariedade internasionál no kompromisu ba direitus umanus, justisa no dignidade povu sira-nian”, hodi subliña katak xegada forsa multinasionál ida-ne’e marka “esperansa moris-hi'as”. 

Iha nia diskursu, Agio Pereira destaka mós dimensaun oioin hosi kooperasaun bilaterál atuál. "Ohin-loron, relasaun entre Timor-Leste ho Austrália mak Estadu soberanu rua, viziñu no parseiru, ligadu ho interese komún no kompromisu ida ba kooperasaun", nia hatete, hodi refere ba apoiu Austrália nian durante pandemia COVID-19, nune'e mós adezaun Timor-Leste ba ASEAN no Organizasaun Mundial Komérsiu.

Nia mós subliña importánsia hosi asinatura, iha loron 6 fulan-marsu tinan 2018, hosi Tratadu kona-ba Fronteira Marítima, "Marka ida ne’ebé importante liu iha ita-nia relasoins bilaterais", ne'ebé iha "onra atu asina hodi ami-nia nasaun nia naran". Tratadu ida-ne'e, nia subliña, "estabelese definitivamente fronteira ida ne'ebé justu entre ita-nia nasaun rua, bazeia ba direitu internasionál - ezemplu inspiradór ida ba mundu kona-ba rezolusaun disputa ho forma pasífika" no reprezenta "inísiu foun ida duni". 

Ikusliu, ko’alia liu kona-ba papél esensiál Grupus Amizade nomos plataformas ligasaun direta entre komunidades, hodi subliña katak, “konferénsia ida-ne’e la’ós de’it eventu simbóliku ida. Ida-ne’e nu’udar selebrasaun ida ba lasus istórikus ne’ebé halo ita hamutuk, afirmasaun ida kona-ba ita-nia prezente no investimentu ida iha futuru ne'ebé ita hakarak harii hamutuk”. Nia konklui ho mensajen esperansa nian ida: "Atu amizade ida-ne’e, ne’ebé moris iha susar laran, hametin husi solidariedade no hafoun husi kooperasaun entre komunidades, kontinua sai ponte ida entre ita-nia povu sira – ponte ida ba entendimentu, progresu no esperansa – no mós sai inspirasaun ida ba mundu.”

Durante loron rua ne’e, partisipante sira fahe esperiénsia no prátika di’ak iha sesaun aprezentasaun, ezibisaun vídeo no grupu diskusaun, ho objetivu atu elabora planu asaun estratéjiku ida ba dékada oin mai. Programasaun ne’e inklui mós espozisaun ba fotografias, vídeos, folletus, no produtu artezanatu sira ne'ebé liga ho projetu grupu amizade, nune’e mós kalan kulturál ida ho aprezentasoins hosi reprezentante sira hosi munisípiu Timor-Leste no hosi diaspora. 

Grupu Amizade Austrália nian liu tolunulu maka reprezenta, inklui Friends of Aileu, Friends of Baguia, Friends of Baucau, Friends of Ermera, Friends of Suai/Covalima, Friends of Lacluta, Friends of Lolotoe, Friends of Maliana, Friends of Venilale, Friends of Vemasse, Friends of Lospalos, Geelong-Viqueque Friendship Schools, Blue Mountains Hatobuilico Friendship Committee, Canberra Friends of Dili, Ballarat Friends of Ainaro, Bendigo-Maubisse Friendship Committee, no seluk tan. 

Konferénsia Sidades Amigas Timor-Leste–Austrália ne’e nu’udar momentu importante ida iha konsolidasaun relasoins ho baze komunitária ne’ebé, durante tinan 25 ikus ne’e, promove ona solidariedade no dezenvolvimentu hamutuk entre país rua ne’e.