Governu Timor-Leste

Ministru Prezidénsia Konsellu Ministrus, Agio Pereira, iha loron 10 fulan-jullu tinan 2025, iha Palásiu Governu, Dili, simu Diretór Ezekutivu Sentru Nasionál Chega!, Hugo Maria Fernandes, Prezidente Konsellu Administrasaun, Manuel M. Pereira, no membrus hosi Konsellu Konsultivu Internasionál Sentru Chega!.

Durante sorumutu ne’e, diskute aspetu oioin kona-ba misaun Sentru Nasionál Chega! no áreas atuasaun nian ne’ebé maka membru sira hosi Konsellu Konsultivu Internasionál kontribui hodi hametin instituisaun ne’e. 

Konsellu Konsultivu Internasionál hetan nomeasaun tuir despaxu Primeiru-Ministru, Kay Rala Xanana Gusmão nian, iha loron 27 fulan-setembru tinan 2023, ba tinan tolu 2023-2026. Membru sira ne’ebé partisipa iha sorumutu ho Ministru Agio Pereira ne’e maka hanesan tuir mai ne’e: David Scott Webster (Kanadá), Sandra Marisa Ramos Gonçalves (Portugál), Akihisa Matsuno (Japaun), Alan Michael Lapsley (Áfrika Súl), Galuh Wandita Soedjatmoko (Indonézia), Augusto Jr. Miclat (Filipinas) e Khoo Ying Hooi (Malázia). 

Ho perfíl ne’ebé la hanesan no esperiénsia oioin, membru Konsellu sira hetan nomeasaun ho objetivu atu apoia Sentru Nasionál Chega! iha konsolidasaun ninia papél nu’udar instituisaun direitus umanus, tuir objetivus ne’ebé define ona iha ninia Planu Estratéjiku. Apoiu Konsellu nian mós foka ba internasionalizasaun Relatóriu Chega nian! no rekomendasoins hosi Komisaun Akollimentu, Lia-loos no Rekonsiliasaun (CAVR, sigla iha lian portugés) no Komisaun Lia-loos no Amizade (CVA, sigla iha lian portugés), iha kuadru programas prezervasaun memória istórika, edukasaun, solidariedade, no divulgasaun legadu CAVR nian, no mós Planu ba Monitorizasaun Aplikasaun ninia Rekomendasaun sira.