Governu Timor-Leste

Primeiru-Ministru vizita infra-estrutura Barrajen Wlingi, iha loron 10 fulan Dezembru, iha Blitar, Java Leste, no hatudu nia haksolok hodi refere katak infra-estrutura hirak ne’e bele sai exemplu no sei aplika mós iha Timor-Leste.

Ulun bo’ot Governu nian ne’e hateten mós katak téknolojia irigasaun nian no produsaun eletrisidade ne’ebé mai hosi bee iha Barrajen Wlingi nian ne’e di’ak teb-tebes no bele sai ezemplu hodi halo iha ita nia rain, tanba barrajen hanesan ne’e mak bele benifisia populasaun sira ne’ebé mak hela besik ho barrajen ne’e.

“Hau agradese tebes ba Indonésia, tanba fó lisensa mai ami atu halo estudu konparativu iha barrajen ne’e. Iha futuru mai sei servisu hamutuk iha infra-estrutura barrajen nian ho Indonésia, hatutan Xanana Gusmão.

Iha fatin hanesan, Diretór Arborikultura no Hortikultura, Gil Rangel da Cruz, informa katak, “iha ita nia rain eziste barrajen hamutuk 15, ne’ebé seidauk optimál. Tanba ne’e liu hosi estudu ida-ne’e hau hetan uitoan koñesimentu oinsá bele utiliza barrajen sira ne’ebé mak agora dadaun ita iha”.

Nia realsa liután, ho exemplu hosi konseitu dezenvolvimentu infra-estrutura Barrajen Wlingi nian ne’e, ita hein katak bele kapasita tan agrikultór sira iha Timor-Leste.

Nune’e mós Diretór empreza Jasa Tirta I, Tjoek Waluyo Sublijanto, hateten “ Estudu komparativu Governu Timor-Leste nian ne’e ho objetivu atu aprende oinsá atu dezenvolve no halo jestaun ba irigasaun.

Tjoek esplika mós katak, buat di’ak balun hosi Barrajen Wlingi ne’e mak atu kontrola mós ba inundasaun, prodús enerjia elétrika nomós bele kanaliza bee ba natar.

Akompaña vizita Primeiru-Ministru nian ne’e, Sekretáriu Estadu Pekuária, Valentino Varela, Sekretáriu Estadu Arborikultura no Hortikultura, Marcos da Cruz, no Sekretáriu Estadu Defeza, Júlio Tomás Pinto.