Ministru Agio Pereira hala’o sorumutu ho Banku Mundial hodi Diskute Prioridade Parseria Foun ho Timor-Leste
Ministru Prezidénsia Konsellu Ministrus, Agio Pereira, ohin, loron 26 fulan-juñu tinan 2025, iha Palásiu Governu, simu Diretora Banku Mundiál ba Indonézia no Timor-Leste, Carrie Turk, no Reprezentante Korporasaun Finansas Internasionál (IFC) nian iha Timor-Leste, David Freedman, hodi ko’alia kona-ba prioridade sira Governu nian iha prosesu definisaun Kuadru Parseria foun ida ho Banku Mundiál. 
Carrie Turk informa katak Banku Mundiál hahú ona prosesu elaborasaun Kuadru Parseria foun ho Timor-Leste, ne’ebé sei troka programa tinan 2020–2024 no sei orienta kooperasaun iha futuru entre instituisaun ne’e no nasaun. Nia salienta katak etapa foun ida-ne’e presiza prosesu konsulta ida ho Governu, ho objetivu atu garante katak projetu sira ne’e reflete ba prioridade nasionál sira.
Ministru Agio Pereira agradese ba Banku Mundiál nia apoiu, liuliu iha área jestaun finanseira públika no fortalesimentu institusionál, no reafirma kompromisu Governu nian atu kontinua hakle’an parseria ida-ne’e. Entre prioridade nasionál sira, nia destaka expansaun no modernizasaun ba Aeroportu Internasionál Prezidente Nicolau Lobato, nune’e mós dezenvolvimentu ba Kosta-Súl no ba projetu Greater Sunrise, ne’ebé konsidera hanesan eixu estratéjiku sira ba kreximentu ekonómiku nasaun nian. 
Iha setór agríkola, Ministru aborda importánsia atu hasa’e produtividade no adota medida sira ne’ebé kontribui ba redusaun kustu foos nian. Nia mós hatudu ninia interese atu kontinua kolabora ho Banku Mundiál iha área sira ne’ebé aliña ho Programa Governu Konstitusionál da-9 nian, hodi garante katak projetu sira ne’e prodús rezultadu ho impaktu diretu no pozitivu ba komunidade sira.
Enkontru ne’e inklui mós troka hanoin kona-ba prosesu adezaun plena Timor-Leste nian ba ASEAN, hodi destaka nesesidade investimentu iha infraestrutura nasionál, hanesan estabelese ona iha roteiru adezaun nian.
Parte rua rekoñese importánsia atu mantein no hametin kolaborasaun ida-ne'e. Carrie Turk repete Banku Mundiál nia prontidaun atu apoia projetu relevante sira ne’ebé aliña ho Governu nia prioridade sira, enkuantu Ministru Agio Pereira reafirma Ezekutivu nia kompromisu atu kontinua fahe informasaun estratéjika no identifika área prioridade sira ba finansiamentu no asisténsia téknika, ho objetivu atu finaliza Kuadru Parseria foun.
