Governu Timor-Leste

Timor-Leste liuhosi Sekretariadu Permanente Forum ba Kooperasaun Ekonómika no Komersiál entre Xina no País Lian Portugés (Forum Makau), partisipa iha Forum kona-ba Dezenvolvimentu Ekonomia no Peskas, ne’ebé hala’o iha loron 13 to’o 15 fulan-juñu tinan 2025, iha sidade Fuzhou, provínsia Fujian, Xina.

Delegasaun timoroan ne’e marka prezensa iha Semana Indústria Peskeira Estreitu Taiwan, iha Espozisaun Internasionál Peska Xina nian ba da-17 no Forum “Navegasaun Intelijente”, ne’ebé ko’alia kona-ba oportunidades ba kooperasaun ekonómika no téknika iha setór peskas nian.

Durante sesaun ne’ebé dedika ba País Lian Portugés, Delegadu Timor-Leste iha Forum Makau ne’e, António Ramos da Silva, destaka poténsia investimentu país nian, liuliu iha setór peskas. Durante ninia intervensaun, Delegadu timoroan ne’e subliña mós avansus iha konektividade entre Timor-Leste ho Xina, ho destake ba inísiu vou diretu entre Dili ho Xiamen, ne’ebé halo operasaun hosi kompañia aérea nasionál "Aero Dili" dezde fulan-fevereiru tinan 2025, no ba kooperasaun marítima ne'ebé aumenta.

Iha Espozisaun Internasionál Peska Xina nian, Timor-Leste aprezenta ninia vizaun estratéjika ba dezenvolvimentu ekonomia azúl nu’udar motór ba kreximentu sustentável. Partisipasaun ne'e atrai interese hosi empreza xineza oioin iha área akuakultura, enjeñaria no teknolojia tasi nian, inklui Fujian Fishery Engineering Construction and Design Institute no Fujian Xinmao Fishery Development Co., Ltd.