Parlamentu Nasionál aprova alterasaun daruak ba Estatutu Ministériu Públiku
Ministru Prezidénsia Konsellu Ministrus, Agio Pereira, nu’udar Ministru Justisa Interinu, ohin, loron 23 fulan-juñu 2025, partisipa iha sesaun plenária Parlamentu Nasionál nian ba Votasaun Finál Globál ba Proposta Lei n. 17/VI (2.ª), ne’ebé hala’o Alterasaun Daruak ba Lei n. 7/2022, 19 fulan-maiu, Estatutu Ministériu Públiku nian. Proposta ne'e hetan aprovasaun ho votu afavór 38, abstensaun neen no laiha votu kontra. 
Alterasaun ida-ne’e ho objetivu atu introdús norma ida iha dispozisoins tranzitórias no finais, ne’ebé permite Prokuradoria-Jerál Repúblika, liuhosi ninia órgaun jestaun no dixiplina, nomeia majistradus ba kargu Inspetór Koordenadór Ministériu Públiku no Prokuradór Repúblika Koordenadór ne’ebé, to’o kria kondisaun adekuada sira, seidauk iha klase ka kategoria ne’ebé Estatutu ezije. To’o konkursu no promosaun ba kategoria Prokuradór Repúblika Rekursu hala’o, alterasaun ne’e sei permite mós Prokuradór Repúblika sira Klase da-1 nian atu hetan nomeasaun ba pozisaun sira ne’ebé presiza kategoria ida-ne’e.
Alterasaun lejizlativa ne’e ho objetivu mós atu permite Prokuradoria-Jerál Repúblika, tuir Konstituisaun Repúblika, hala’o konkursu ba asesu ba kategoria Prokuradór Repúblika Rekursu. 
Durante votasaun espesialidade ne’e, aprova mós alterasaun ida ba normas tranzitórias hodi permite kargu koordenadór Gabinete Sentrál ba Kombate Korrupsaun no Krime Organizadu, Gabinete Sentrál Kontensiozu Estadu no Interese Koletivu no Difuzu no ikusliu Gabinete Kooperasaun Judisiária, Direitu Komparativu no Relasoins Internasionais sei kaer hosi Adjuntu Prokuradór-Jerál Repúblika ne’ebé nomeia hosi Prokuradór-Jerál Repúblika, to’o ezisténsia Prokuradór Repúblika Rekursu sira. Iha diskusaun espesialidade, aprova mós kriasaun dispozisaun tranzitória ida-ne'ebé sei permite katak, to’o bainhira iha prokuradór karreira sira ne'ebé okupa pozisaun hotu-hotu ne'ebé disponivel iha Ministériu Públiku, prokuradór Repúblika klase da-3 ho pelumenus esperiénsia tinan hitu, valór mínimu “Bom” no pasa iha konkursu públiku bele hetan promosaun ba prokuradór Repúblika 2.ª klase. Aleinde ne’e, prokuradór Repúblika klase da-2 ne’ebé iha pelumenus tinan neen iha kargu ne’e, ho mós valór mínimu “Bom” ho distinsaun, no ne’ebé pasa iha konkursu ne’ebé organiza regularmente husi Konsellu Superiór Ministériu Públiku, bele hetan promosaun ba prokuradór Repúblika klase da-1. Promosaun sira ne’e tuir kritériu ne’ebé estabelese ona iha n.º 1 hosi artigu 187.º hosi Estatutu Ministériu Públiku.
